La Roja an ṭha tawk em?

France-in rin an hlawh a, hetihruala zawhna langsar tak chu Spain hi France hneh turin an ṭha tawk ang em? tih chu zawhna a ni a, a chhanna chu, "Ṭha tawk ang" tih hi a ni - chuvang tak chuan he inkhel hi en a châkawm hle.

Spain boss Luis de la Fuente-a'n 4-3-3 formation a hmang tlangpui a, zaninah pawh hetiang bawk hian inrem leh tura ngaih an ni - Unai Simon chu si ban nghak tur a ni dawn a, a hmaah Pau Cubarsi leh Aymeric Laporte an ding ang.

Fullback-ah Pedro Porro leh Marc Cucurella ten an hna ngai an chelh tura ngaih a ni a, hetihrual hian player pahnih hi tlanchhuah nuam ti mi an nih avangin De la Fuente tan ngaihtuahna thar sen a ngai mai thei.

France-in mual sir aṭanga nawr turin Ousmane Dembele leh Desire Doue an nei dawn a, chutiang kara tlarhnung player-te tlanchhuak tam lutuk chu a fuh lo mai thei!

Midfield-ah Rodri chu innghahna lungphum a ni leh dawn a, Manchester City midfielder hian Michael Olise a dang chat a, a dah ṭha thei a nih chuan Kylian Mbappe-a'n supply a hmu tlem sawt dawn tihna a ni a, Rodri chet ṭhat a pawimawh dawn.

De la Fuente-a'n Belgium lakah Pedri aiah Fabian Ruiz rin a thlang a, a tisual lo - France lakah tharum ngah zawk leh defensive game-a ṭha zawk Ruiz hi a ring nawn a nih pawhin a mak lo ang.

Fabian Ruiz a ring nawn a nih chuan Dani Olmo chu number 10 ni chiang leh tura ngaih a ni a, mual sirah Lamine Yamal leh Alex Baena te awmin, false nine-ah Mikel Oyarzabal a awm ang a, France tan buaina tham an tling dawn.