Coach huaisen Rudi Garcia chu!

Belgium fan-ten an ring ngam lo chungin Rudi Garcia-a'n thutlukna huaisen tak tak a siam fo a, Spain lakah thutlukna mak a siam leh ang em? tih chu mi tam tak zawhna a ni.

Belgium hian 4-2-3-1 formation an hmang tlangpui a, mahse, Rudi Garcia danglamna chu player langsar hisapin thutlukna a siam ngai lo - team mamawh ang zelin a rem a, mawhphurhna lak a ngam tlat.

Senegal laka 2-0 a an hnufual lai khan player pawimawh Kevin de Bruyne leh Jeremy Doku a la chhuak a, mi tam tak mak tih a hlawh. Mahse, player pahnih a lakchhuah hnuah si phurh an sut a, extra time-ah chakna goal an khung zui!

Round of 16-ah phei chuan player pahnih hi bench-ah an awm a, KDB phei chu a lut lo hrim hrim! Mahse, World Cup thlengtu zinga mi USA chu 4-1 in an sawp a, result ṭha tak an hlawh chhuak.

Season hmasaa hliam vanga inlan tam lo Romelu Lukaku pawh bench-ah a dah ngam ṭhin a, mahse, Belgian striker hian bench aṭanga a luhin danglamna a thlen ṭhin.

Garcia chuan, "World Cup ṭan hma khan, mi ṭhenkhatin match pawimawh takah KDB leh Doku te bench-a ka dah tur thu min hrilh ta se, keipawhin ka awih bik kher lo ang.

"Mahse, World Cup-ah hi chuan thil a danglam ṭhin. Tuna an fitness level, buaina an neih ho thamtê pawh ni se ngaihtuah a ṭul a, a pawimawh berah chuan, "Tu nge khel ṭha?" tih hi ngaihtuah tel a ngai.

"Player fit ṭha leh, khel ho thei ka thlang a ni," a ti hmiah - result-in a zir miau avangin a thusawi an ṭawmpui a, chak lo ngat se chuan, a mawhphurhna a sang ve khawp ang. Hei vang tak hian coach huaisen lo tan chuan a thutlukna siam ang hi siam chi a ni lo!

Mahse, Spain lakah erawh creative midfielder an mamawh miau avangin KDB chu lo kir tawh tura beisei a ni a, number 10-ah KDB hi awmin, Leandro Trossard leh Jeremy Doku ten an thlawp ang.

Tlarhmaah Lukaku aiah Charles De Ketelaere chu bul ṭan nawn tura beisei a ni a, kum 25 mi forward hian World Cup-ah goal hnih leh assist vawi khat a nei tawh a, rin nawn a nih a rinawm.

Goalkeeper-ah world class keeper Thibaut Courtois an neih avangin an buai lo a, hetihrual hian defensive midfield-ah player pawimawh Amadou Onana a inhliam avangin an buai det dawn.

Chuti a nih chuan defensive midfield-ah Hans Vanaken-a'n Youri Tielemans a kawp ang a, hei tak hi starting XI-a KDB lo kirna kawng hawngtu langsar a ni ang.

Belgium-in press na tak US lakah 'long ball' an hmang ṭangkai a, US ai maha nawr na Spain an hmachhawn dawn avangin, a hnung lam aṭanga ball sem turin Courtois a pawimawh leh dawn.