Tlarhnung phui Spain-in Portugal an pet chhuak
FIFA World Cup last 16-a inkhel châkawm ber Spain leh Portugal inkhelin beisei a pha lo a, team ṭha zawk La Roja 1-0 a chakin Mikel Merino-a'n goal awmchhun a khung. European champion hian kumin World Cup-ah goal chhuah loin quarterfinal an lut.
Luis de la Fuente hote hian July 10, Zirtawpni zan quarterfinal-ah United States sawptu Belgium an hmachhawn dawn. Spain hi kum 2010-a an champion hnua quarterfinal an luh lehna hmasa ber a ni.
Ronaldo a langsar
Roberto Martinez-a'n rinlawk angin Cristiano Ronaldo bul a ṭantir a, Croatia an hneh ṭum aṭangin player pakhat chiah a thlak. Rafael Leao aiah Joao Felix a lut a, Ronaldo hnungah Bruno Fernandes bakah PSG midfielder pahnih Vitinha leh Joao Neves te an awm.
Spain-in right back-ah Pedro Porro an chhawr nawn a, tlarhmaah Mikel Oyarzabal, Álex Baena leh Lamine Yamal te an awm. Yamal a langsar a, Barcelona forward chawm turin club tana a khelhpui Pedri leh Dani Olmo te an awm bawk.
A tir a hmuhnawm
Inkhelh ṭan tirh lamah inkhel a nung ṭha a, goal chance pawh a tam. Mikel Oyarzabal-a'n Portugal keeper Diogo Costa tan hna a siam nghal a, João Cancelo pawhin Spain tlarhnung a rum ṭhaih bawk.
Oyarzabal hian chance ṭha bik a nei a, Olmo ball pek chu Spain forward Oyarzabal hian keeper Costa chauh a hmachhawn chungin goal zawnah a pet lo. Mipui mit fukna Ronaldo pawh a rawn inlar a, kawh zetin goal-ah pet mah se Unai Simon tan dan harsa a ni lo thung.
Yamine Yamal pawhin keeper Costa tan hna a siam hma a, a per chu Álex Baena-a'n goal-ah pet lehin keeper Costa-a'n a dang ṭha hle. First half a entlak a, Ronaldo pawhin goal khungna remchang nei mah se a bin nat tawk loh avangin Unai Simon-a'n a man chat.
Left back hmuhnawm Nuno Mendes-a'n kawh zetin box pawn aṭangin a pet a, Pedro Porro-a'n tauhin goal ban a per a, Spain an vannei - goal-ah a lut lo. First half-ah goal hmuh tur a awm lo a, a tawp thlengin a hmuhnawm thung.
A hmuhnawm tawh lo
Second half-ah inkhel a hmuhnawm sawt tura beisei ni mah se a hmuhnawm lo sawt a, beisei a san avangin a hmuhnawm loh dan a chiang lehzual. Portugal defender hmuhnawm ber Mendes hliam vangin lakchhuah a ni a, Yamal-a'n Mendes-a awm loh a hmang ṭangkai thei lo.
Ronaldo kum upatna a lang ṭan a, tlarhmaah reh viau mah se Martinez-a'n thlak a tum chuang lo. Spain lam pawh an hmuhnawm bik lo a, inkhelah chungnung mah se goal hmaah an hriam bik lo a, Yamal meuh pawhin pass sual a ngah.
A tawpah Portugal-in Martinez-a thutlukna siam fuh tawk lo an tuar a, Spain-in De la Fuente thutlukna siam fuh an hmang ṭangkai thung. Injury time minute khatnaah Spain-in freekick an pet thut a, substitute pathum Fabian Ruiz, Ferran Torres leh Merino ten chiang taka Portugal tlarhnung ṭhiatin Arsenal midfielder chakna goal a khung.
Goal luh hnuah Portugal ben harhin an awm a, Bernardo Silva leh Joao Neves te hmangin chance nei leh mah se an tet deuh avangin goal an khung lo ve ve. Manchester City-a khel dun ṭhin Bernardo Silva leh Rodri te an intibuai a, hei hian World Cup ropuizia a pholang. Referee-in hun pek belh zat minute hniha a pelh hnuah hun tawp hamrik a ham a, chak phu zawk Spain 1-0 in an chak.