Hliam vangin Maja chak lo

Wimbledon-ah French Open hmeichhe finalist Maja Chwalińska chuan Thawhṭanni khan first round-ah Thailand player Mananchaya Sawangkaew a hmachhawn a, hliam a tawh avangin 6-2, 5-7, 2-6 in an chak lo.

Seeded no. 20 Chwalinska hian set hmasa ber 6-2 in an la a, set hnihnaah pawh 5-2 a hma hruai hmanin 'match point' a nei hman hial. Mahse, Polish nula hi court chhungah a tlu sual a, a ke rekah hliam a tuar.

Chwalinska hian a ke rek hliam bakah hnungzâng hliam nei chungin a khel lui a, ngai a awh tawh lo. Qualfying round aṭanga khel ṭan Sawangkaew hian 2-6, 7-5, 6-2 in an chak ta zawk.

Inkhelh banah Maja chuan, "Wimbledon a ni a, hliam vanga chawlh kha ka duh lo. Chawlh kha thlang ila, ka inchhir ka inrin avangin khel zui tur khan thutlukna ka siam ta zawk a ni," tiin a sawi.

Thawhṭanni khan seeded no. 1 Aryna Sabalenka chuan Teodora Kostovic chu 6-2, 6-3 in an hneh nghal a, Belarusian nula hi a khelh danah a lungawi hle. Inkhelh banah Sabalenka chuan, "Ka inteh dan chuan ka khelh dan chu 10-ah pariat hmu ang vel ka ni," tiin a sawi.

Nimin khan seeded no. 6 Amanda Anisimova chuan harsatna nei loin Lina Gjorcheska chu 6-3, 6-2 in a hneh. Vawiin hian second round khelh ṭan a ni dawn a. French Open champion Mirra Andreeva-i'n Barbora Krejcíková a hmachhawn ang. Andreeva hian first round-ah Magda Linette chu 7-5, 6-4 in a hneh a ni.