Reece James dinhmun chiang lo

Football khawvela player inhliam ngun ber pawl tih hiala chhal ngam Reece James a inhliam leh tawh. England right back hi an group stage match tawp berah hliam vangin a inlan thei lo mai thei - Pathianni zing dar 2:30-ah Panama an hmachhawn ang.

Chelsea captain hian Thomas Tuchel-a hnuaiah England tan hmun pawimawh a chang a, an match hmasa pahnihah bul a la ṭan ve ve - Reece James inlan thei lo ta se, tu nge a luhtir ang? tih chu zawhna a ni mek.

James hian he thu buatsaih a nih lai hian team training a la zawm lo a, a inlan ai chuan a inlan loh a rinawm zawk. Hetihlai hian Arsenal midfielder Declan Rice pawh Ghana nena an inkhelah hliam tenau vanga lakchhuah a ngai.

Rice erawh a hliam a ngaihtuahawm lo nia sawi a ni a, hetihrual hian an hmachhawn tur hi Panama an nih miau avangin Tuchel-a'n knockout stage thlir chunga hahdamtir a thlang a nih pawhin a mak lo ang.

Hei mai a ni lo - Rice hian Ghana lakah khan yellow card a hmu a, Panama lakah a hmuh leh hlauh chuan round of 32 khel lo tura hrem theih a ni dawn.

World Cup danah, player-in group stage-ah yellow card pahnih a hmuh chuan, a match khelh leh turah a inlan thei lo. Mahse, yellow card pakhat chauh a hmu a nih chuan, knockout stage-ah chuan a yellow card hi thai reh a ni tawh ang.

Chumi awmzia chu Rice hian yellow card a hmuh belh lo a nih chuan, knockout stage-ah chuan yellow card a neih sa kha thai bo a ni dawn. Mahse, Panama laka a hmuh belh a nih erawh chuan, round of 32-ah an khingpui a hmachhawn thei dawn lo.

Tuchel-a tan fim taka thutlukna siam a ngai tihna a ni a, Rice chhawr ai chuan chhawr loh a fuh zawk mai thei. England hi group L-ah hmahruaitu an la ni mek a, Panama an hneh a nih chuan group hmahruaitu ni chungin round of 32 an lut ang.

Three Lions hian match hmasa berah Croatia chu 4-2 in hneh mah se, match hnihnaah Ghana chu 0-0 in an inhnehtawkpui a, group hmahruaitu ni turin tla tawh Panama lakah chak ngei an mamawh.