Group B : A che che sih hlawkah

FIFA World Cup group stage-in tawp lam a hnaih a, zanin dar 12:30 hian group B team paliten match hnuhnung ber an khel dawn. Inelna thlengtu Canada, Switzerland, Bosnia and Herzogovina leh Qatar te hi tling thei leh tla thei vek an la an ni.

Vancouver-ah point li hmu tawh pahnih Canada leh Switzerland te an inkhel ang a Seattle-ah Bosnia and Herzogovina leh Qatar te an inkhel thung ang.

Canada beiseina

Canada-in match hmasa berah Bosnia and Herzogovina hmachhawnin a vawi khat nan World Cup-ah point an hmu a, match hnihnaah Qatar 6-0 a sawpin a vawi khat nan hnehna an chang. Jesse Marsch leh a hote tan an thlen chin apiang hi thil thar a ni zel a, chak lo pawh ni se second round lut theihna kawng a inhawng zau hle.

Group match hnuhnung bera an hmachhawn tur Switzerland hi an group-a team ṭha bera ngaih ni mah se kum 2002 khan friendly match-ah 3-1 in an hneh. Team pahnihin point li an hmu ve ve a, Canada hi goal difference-ah an ṭha zawk.

Team pahnih hi an inhnehtawk a nih chuan an pahnih hian knockout stage an lut ve ve dawn. Chutihrualin group-a pakhatna hian pathumna an hmachhawn dawn a, pahnihna erawhin group A pahnihna an hmachhawn thei thung. Group A-ah Mexico-in pakhatna dinhmun an hauh tawh a; South Korea, Czech Republic leh South Africa te an hmachhawn thei tihna a ni.

Chak a ṭul

Bosnia and Herzogovina leh Qatar te inkhel turah erawh chak ngei a ṭul a, chuvangin ram pahnih tan defensive game khelh a rem lo a, goal khung tumin inkhelh ṭantirh aṭangin an innawr ang.

Team pahnih hi an goal difference a chhiat avangin pahnihna nichunga knockout stage luh a har tawh dawn a, chutihrualin point li an hmuh theih chuan pathumna nichunga second round luh theihna kawng a la inhawng dawn.

Ṭum hnih an inkhelh tawhah Qatar hian kum 2000 khan 2-0 in hnehna an chang a, kum 2010 khan 1-1 in an inhnehtawk leh bawk. An intawn hnuhnun ber aṭanga kum 16 a ral leh tawh avangin an intawnna hi chu tehfunga hman a rem tawh lo a, Bosnia and Herzegovina hi a buk rit zawk tur an ni.