Mbappe-a'n Klose record a nih rual

Lionel Messi awm ta lo se chuan Kylian Mbappe chanchin hi hahipa sawi tham a ni. Mahse, Argentina captain Messi a awm si a, ram tana vawi 100 khelhnaa goal hnih khungtu Mbappe pawh a ropui tur angin a ropui ta lo.

Thawhṭanni zan khan France-in Philadelphia-ah Iraq an hmachhawn a, 3-0 in an sawp. Les Bleus tan Kylian Mbappe-a'n goal hnih khungin Ousmane Dembele-a'n goal khat a khung bawk. Mbappe hian FIFA World Cup-ah goal 16 khungin Miroslav Klose record a nihrual chiah a, Messi a phak lohna pawh goal hnih chauh a ni.

Mi bik Mbappe

France-in Iraq lakah bul an ṭan ṭha a, an goal bawh nat rah an seng. Minute 14-na lekah Mbappe-a'n box pawn aṭangin a ke vei lamin kawh zetin a pet lut a, France-in hma an hruai hma hle.

Mahse, hydration break hnuah Iraq an siam ṭha a, hliam vanga captain Aymen Hussein an chan chungin France lakah an khel ṭha hle. Les Bleus-in chance ṭha an nei tawh lo.

Ruahsur vanga hun rei tak an chawlh hnuah second half an ṭan leh a, Iran tlarhnung tihsual zarah Mbappe-a'n minute 54-naah a khung. France captain hian World Cup match 16 aṭangin goal 16 a khung a, Klose record a nih rual. Real Madrid striker hi kum 27 mi lek a ni a, Lionel Messi aiin goal hnihin khung tlem mah se record siam turin a dinhmun a ṭha hle.

Goal khat leh

France-in an nawr na chhunzawm a, Mbappe ball pass ṭha chu Michael Olise-a'n keeper pet khum nan hman tum mah se crossbar a pet per. Dembele ball pet pawh keeper Ahmed Basil-a'n a dan per hnuah goal ruakah Adrien Rabiot-a'n a tauh lut thei lo.

Ballon d'Or kawltu Dembele-a'n chance ṭha dang hlah leh mah se minute 66-naah goal a khung. PSG forward Dembele-a'n chiang zetin a pet lut a, France-in inkhel thunun mah se goal dang an khung belh tawh lo.

France 3-0 in an chak a, hnehna an chan kawngah Mbappe a pawimawh hle. Kylian Mbappe hian ram tan match 100 a khel a, France tana amah aia khel tam pakua chiah an awm tawh. Mbappe hian ram tan goal 60 a khung tawh a, Les Bleus tana goal khung tam ber record kawltu a ni bawk.