Real-ah Camavinga nghet lo

Real Madrid chuan intuaithar hna an thawh mekah an midfielder, Eduardo Camavinga chu chhuak thei tur zinga a hming a tel niin Spanish chanchinbu te an ziak a, Real-ah Camavinga dinhmun a chiang lo.

Season hman zawh takah khan Real an che ṭha tawk lo a, trophy chawi loin season an khar. Los Blancos chet ṭhat tawk loh chu player ten an tuar a, World Cup khel turin Spain squad-ah Real player an tel lo a, Camavinga pawh hi France-in an ko lo.

Kum 23 mi Camavinga hi Champions League second leg-ah, Bayern Munich nen an inhmachhawn ṭumin ṭul lo takin red card a hmu a, hemi hnu hian sawisel a tawk nasa zual a, season thara an coach tur Jose Mourinho ruahmannaah pawh a tel lo nia sawi a awm.

Hetihlai hian French midfielder hian ngaihventu a tlachham lo a, Inter Milan chu thawm nei lian ber an ni a, Serie A champion hian Camavinga hi an midfield tichak tura lak a duh.

Inter president Giuseppe Marotta pawhin Santiago Bernabeu a tlawh ṭumin, Real president Florentino Pérez chu player hrang hrang chungchang a sawipui a, Camavinga chungchangah inbiakna an nei tawh niin an sawi bawk.