Point khat vek hmu group B inlan zan; Switzerland vs Bosnia: Canada vs Qatar

FIFA World Cup 2026-ah zanin dar 12:30 hian Switzerland leh Bosnia and Herzogovina te an inkhel dawn a, Zirtawpni zing dar 3:30-ah inelna thlengtu Canada leh Qatar te an inkhel chhunzawm lehnghal ang. Group B team palite hian point khat ṭheuh an hmu tawh a, zanin inkhel hi a pawimawh hle.

Thih leh dam

Inelna ṭan hmain group B team pali zingah Switzerland buk a rit a, mah se ranking-a sang ber team hian Qatar lakah hma takah khung mah se 1-1 in inkhel a tawp. Qatar lakah point khat chauh an hmuh avangin Murat Yakin hote tan hna a harsat phah dawn a, Bosnia and Herzogovina nena an inkhel turah pressure an ngah phah ang.

Ram pahnih hi March 29, 2016 khan friendly match-ah an inkhel tawh a, Switzerland 2-0 in an chak. Tun ṭumah erawh kum 10 liam taa an inkhelhna nen chuan an danglam tawh dawn. Bosnia hian World Cup khel pha turin Italy leh Wales te an hneh thei a, Switzerland hi an hlau bik lo ang.

Bosnia and Herzogovina pawh hian match hmasa berah Canada lakah Jovo Lukic hmangin khung hmasa mah se 1-1 in an inhnehtawk. Chutihrualin Sergej Barbarez hote hian match tawp berah Qatar an la hmachhawn dawn a, Switzerland laka point khat hmuh pawh result ṭha tak a ni thei dawn.

Nati (Switzerland sawina) tan Granit Xhaka a pawimawh leh dawn a, Manuel Akanji nen tlarhnung tihphui kawngah an pawimawh dawn. Chutihrualin chak an mamawh avangin tlarhma pathum Breel Embolo, Dan Ndoye leh Ruben Vargas te goal hmaah an hriam a ṭul ang.

Bosnia lamin tharum an nei ṭha a, boruakah an hlauhawm bawk. Match hmasa berah striker chhuanvawr Edin Dezko a khel thei lo a, Switzerland lakah inlan thei tura ngaih a nih avangin Barbarez hote an phur phah khawp ang.

A thlengtu Canada

Inelna thlengtu pathum United States, Mexico leh Canada te an awm a, United States leh Mexico te second round lut turin an dinhmun a ṭha tawh hle. Canada erawh Qatar nena an result hian nghawng thui tak a nei dawn a, point thum an hmu lo a nih chuan first round-a tlak a hlauhawm dawn.

Canada hian an match hmasa berah an player chhuanvawr Alphonso Davies an chhawr thei lo a, Qatar lakah pawh kum 25 mi Bayern Munich defender hi a inlan theih a rinawm lo zawk. Hei vang hian Jesse Marsch-a'n a player neih ang te a chhawr thiam a ṭul dawn.

Ram pahnih hi tun hmain vawi khat chiah an la inhmachhawn a, September 2023 khan friendly match-ah Canada hian 2-0 in hnehna an chang. Goal khungtu Cyle Larin hi kumin World Cup-a Canada tana goal khung tawhtu a ni a, Jonathan David pawh an tun ṭumah hian an rinrawl a ni bawk.

Qatar lamin player chhuan tur ngah lo mah se Switzerland lakah team angin an ṭha tih an pholang. Tun ṭum inelnaah Asia team-te zuam an rem lo a, team pariat inlan tawh zingah Iraq leh Jordan te chauh an la chak lo. Iraq pawh hian Norway lakah team ṭha an nihzia an pholang.

South Korea leh Australia ten hnehna an chang a, Japan leh Saudi Arabia ten team ṭha Netherlands leh Uruguay te an chelh thei a, Iran pawhin inelna thlengtu Untied States-in harsatna an siam chungin New Zealand nen an inhnehtawk. Canada hi Qatar lakah chak tura rinkai zawk an ni nachungin kum 2022-a World Cup thlengtu Julen Lopetegui-a hote hi dah hniam theih an ni lo.