South Korea hmaah a thlengtu Mexico

Kumin World Cup group A-ah chaka bul ṭan pahnih, South Korea leh Mexico te an intawng dawn a, team pahnihte hi champion tura rinkai zingah tel lo mah se an match hmasa berah an chak ve ve a, group stage paltlang turin vawi hnih chak a tawk avangin, naktuk zing dar 6:30-ah inkhel hmunawm a beisei ngam.

Team huaisen

Asia aiawh South Korea-in an match hmasa bera Czech Republic an hneh ṭumin, formation inang hmang mah se a nawrtu zawkah an ṭang a, an chet ranna chu an chakna hnar a ni. Paris St-Germain tana Champions League champion Lee Kang-in a pawimawh leh dawn a, Hwang In-beom leh Oh Hyeon-gyu te nen an inthlawp leh dawn

South Korea innghahna Son Heung-min chuan goal a la khung thei lo a, Tottenham Hotspur forward hlui hian Czech Republic lakah vawi tam chance nei mah se 'net' a la tawn puar thei lo. A thlengtu Mexico lakah chak an duh a nih chuan Son-a chet chhiat a thiang lo a, Wolverhampton forward Hwang Hee-chan a pawimawh bawk ang.

El tri

A thlengtu zinga mi Mexico erawh an ram leilunga khel an nih angin an inringtawk a, opening match-ah South Africa-in an ngam lo hle. South Africa laka goal khungtu Raul Jimenez chu an innghahna tur a ni leh dawn a, Fulham forward hi kum 35 mi ni ve tawh mah se World Cup-ah a vawi khat nan goal a khung a, khung belh zel pawh a duh dawn.

Jimenez bakah kumin World Cup-a goal hmasa ber khungtu Julian Quinones a awm bawk a, Al-Qadsiah forward hi Saudi Pro League-ah top scorer a ni a, Cristiano Ronaldo, Ivan Toney leh Karim Benzema ten an tluk lo.

Engtin zel

Mexico tan South Africa lakah hnawhchhuah a nih avangin, Lokomotiv Moscow centre-back Cesar Montes-a'n South Korea a hmachhawn thei dawn lo a, an captain Edson Alvarez-a'n chu midfielder ni mah se tlarhnungah an din a rinawm.

Hetihlai hian Taegeuk Warriors (South Korea sawina) centre back Kim Tae-Hyeon pawh a ke reka hliam a tawrh hnuah, training zawm leh tawh mah se bul a ṭan a la rinawm loh. Lee Gi-Hyuk chuan a hmunruak a luah leh a rinawm a, Bayern Munich defender Kim Min-Jae leh Lee Han-Beom-te nen an ding ho ang.