Goal thum khungtu Austria

Lionel Messi ropui niah an la hmachhawn tur Austria leh Jordan an inkhel a, Manchester United coach hlui Ralf Rangnick-a enkawl Austria chuan 3-1 in Jordan an hneh.

Austria tan Romano Schmid chuan minute 21-naah goal mawi bik khungin, European team tan hmahruaina goal a khung a, goal dang lut loin chawlhlawk an hmang zui.

Second half ṭan aṭanga minute ngana lekah Jordan hun a thleng a, Qatar club Al Sailiya forward Ali Olwan chuan mawi zetin si phurh sutna goal a khung - an ram chanchina hriat reng tawh tur a ni.

Mahse, inkhel a rei tulh tulh a, team ṭha zawk danglamna a lang. Minute 76-naah Jordan player Yazan Al Arab chuan corner aṭanga ball kal chu an lamah a tilut a, 2-1 in Austria-in hma an hruai.

Minute 90 thlenga goal dang a luh loh avangin, 2-1 in inkhel a tawp mai dawn niin a lang hman. Mahse, hun pek belhah Jordan-in penalty an chawi a, Saleem Obaid-a handball vangin referee-in penalty spot a kawk.

West Ham forward hlui Marko Arnautovic-a'n harsatna nei loin goal-ah a chantir a, 3-1 in an chak - kum 37 mi Arnautovic hian 1-1 a nih laiin goal a khungah a inngai hman a, mahse, VAR inrawlh hnuah Stefan Posch-a handball vangin pawmsak a ni lo.

Kum 1998 hnua a vawi khat nana World Cup khel Austria hian kum 1990 khan USA chu 2-1 in an hneh a, tun hi USA an hneh hnua World Cup-a an chak leh hmasak ber a ni!