Ivory Coast tan Amad Diallo

FIFA World Cup group E inkhel dangah Ivory Coast-in minute 90-naa Amad Diallo goal hmangin Ecuador an hneh a, knockout stage lut turin Eléphants dinhmun a ṭha hle.

Philadelphia-ah inkhel a nung ṭha a, goal chance hmuh tur pawh a tam. Mahse, team pahnihin an chance ṭha neih an hmang ṭangkai thei lo a, first half-ah goal hmuh tur a awm lo. Ecuador forward John Yeboah-a'n crossbar a pet per a, Alan Minda pawhin keeper chauh a hmachhawn hnuah crossbar tho a pet per a, goal hmaah an vanduai hle.

Second half-ah pawh Ecuador an hlauhawm mah se Ivory Coast lamin goal an khung teuh zawk a, Elye Wahi-a'n crossbar a pet per thung. Team pahnih chak tumin an innawr chhunzawm a, a tawpah Ivory Coast an vannei ta zawk. Minute 90-naah Wilfried Singo siam chu substitute Amad Diallo-a'n mawi zetin a khung. Manchester United forward Amad hian France nen friendly match an khelh ṭumah pawh chakna goal a khung tawh bawk.

June 20, Inrinni zanah Ivory Coast-in Germany an hmachhawn dawn a, Ecuador tan insiamremna hun remchang a awm dawn. South America aiawh team hian June 21, Pathianni zingah Curacao an hmachhawn ang.