Goal li khungtu USA!

World Cup thlengtu ram pathum zinga langsar ber USA-in an match hmasa berah goal li an khung nghal a, Paraguay chu 4-1 ngawtin an sawp - knockout stage rim an nam nghal.

US tan Folarin Balogun chuan goal hnih khungin, Giovanni Reyna chuan goal khat a thawh ve bawk a, Paraguay midfielder Damián Bobadilla chuan an lamah a tilut bawk.

Los Angeles Stadium-a inkhelah USA hian goal an khung hma. 'Captain America' hming lem an pek Christian Pulisic chuan defender pahnih ven karah mawi zeta ball a luhpui hnuin, Juventus midfielder Weston McKennie tan a siamsak.

McKennie hian lo 'cutback' lehin, hei hi Sao Paulo midfielder Bobadilla chuan tum loh takin an lamah a tilut a, 1-0 a ni. US hian an la duhtawk mai lo.

Arsenal siam len, AS Monaco-a hming chher Folarin Balogun hun a inher chhuak a, minute 31-naah Pulisic-a siamsak chu khungin, first half hun pek belhah a goal hnihna a khung leh bawk.

USA-in chawlhlawk hmain, 2-0 in hma an hruai der a, Paraguay tan a harsa tawh - minute 73-naah Mauricio chuan si phurh sut ṭhen ve mah se, a team phurna a thlen zo tawh lo.

Hun pek belh minute riatnaah Reyna chuan goal mawi bik khungin, USA chak a nemnghet a, World Cup-a an thlen san ber, kum 2002-a quarterfinal an thlen aia sang thleng turin kawng dik an zawh zel.