Lopetegui kaihhruai Qatar an danglam

Qatar-in World Cup an thlen ṭumin point khat pawh a hmu lo a, kumin inelnaah erawh Spanish coach Julen Lopetegui kaihhruaina hnuaiah an group-a team ṭha bera ngaih Switzerland an chelh. Santa Clara-a inkhelah minute 17-na lekah Breel Embolo hmangin Switzerland-in hma hruai mah se Qatar-in injury time-ah siphurh an sut a, 1-1 in inkhel a tawp.

Inrinni zan inkhelah Qatar forward Edmilson Junior-a'n goalkeeper chauh a hmachhawn hnuah a khung lo a, Switzerland tan Dan Ndoye-a'n chance ṭha a hlah ve nghal bawk. Qatar keeper Mahmud Abunada-a'n penalty a chawi a, minute 17-naah Breel Embolo-a'n kumin inelnaa penalty hmasa ber a khung.

Switzerland-in chance ṭha ṭhahnem tak an hlah a, a tawpah an tuar phah. Qatar lam tan injury time-ah Boualem Khoukhi tihbuai vangin Swiss defender Miro Muheim-a'n an lamah a tauh lut. Qatar-in point khat hlu bik an hlawh chhuak a, group B-a team paliin point khat vek an hmuh avangin second round lut turin beiseina an nei vek.