FIFA-in Omar hlawh pe kim dawn

FIFA World Cup 2026 referee tur zinga mi Somali referee Omar Artan chu United States-in an ram chhungah luhtir an phal lo a, hei vang tun ṭum inelnaah team kaihhruai thei dawn lo. Chutihrualin FIFA erawhin tun ṭum inelnaa a sum dawn tur ang zat hlawh a pe kim vek dawn.

Kar liam ta Thawhṭanni khan US immigration thuneituten Miami-ah Omar hi darkar 11 chhung thu an zawtfiah a, hemi hnu hian a passport leh visa te chu hnawlsak a ni. US sorkar chuan Omar hi hel pawla tel anga an rinhlelh vanga an rama luhtir phal lo niin thuchhuah an siam.

Artan chuan a document neih zawng zawng a dik vek thu a sawi a, Somali hel pawl Al Shabab nen inzawmna a neih leh neih loh an zawh thu a sawi bawk. FIFA official kaihhruaina hnuaiah Artan hi Turkey-ah phur let a ni a, Turkey aṭang hian Somali khawpui Mogadishu a pan a, Somalia aṭanga World Cup referee hmasa ber a ni thei rih dawn ta lo.

Hetichung hian FIFA chuan Artan hi World Cup-a a hlawh tur zawng zawng an pe dawn a, chutihrualin referee-te hian an hlawh tur zat chiah hi an hre lo. Inelna zawhah referee-te hian hlawh hi an dawng ang.