Uruguay fiahna tur Saudi Arabia

FIFA World Cup-a vawi hnih champion tawh Uruguay chuan Thawhlehni zing dar 3:30 hian Miami Gardens-ah Saudi Arabia an hmachhawn dawn. Uruguay hi Argentine coach lar Marcelo Bielsa enkawl a nih vang ringawt pawhin an khel en a châkawm hle.

Group H-ah team tenau Cape Verde awm mah se champion tura rinkai ni pha Spain an awm tel avangin Uruguay tan knockout stage lut turin Saudi Arabia hneh a pawimawh a, Georgios Donis hote tan pawh elpui team laka tlawm a thiang lo.

Bielsa hote hian qualifying round-ah World Cup champion Argentina an hneh a, anmahni chiah hi qualifying round-a Lionel Messi telna team hneh thei awmchhun an ni. Mahse, World Cup kalkawng erawh a awlsam bik lo a, palina a ni hram.

Tun ṭumah hian Uruguay-in 2018 World Cup-a Saudi Arabia an hneh ṭuma goal awmchhun khungtu Luis Suarez an ko tel tawh lo a, Liverpool striker hlui Darwin Nunez chungah an innghat ang. Chutihrualin Nunez chawm tur ball sem thiam Flamengo midfielder Giorgian de Arrascaeta dinhmun a chiang lo a, ram tan vawi 60 inlan tawh Arrascaeta hi a inlan thei lo a nih chuan Uruguay tan channa nasa tak a ni thei ang.

Bielsa hote hi chak tura rinkai zawk an ni a, Real Madrid midfielder Federico Valverde telna team hi an tawh a khirh dawn. Chutihrualin World Cup hnuhnung berah Saudi Arabia hian champion zui ta Argentina an hneh thei a, Uruguay tan point thum chiang sa a ni lo.