European champion Spain khelh zan

World Cup champion tura rinkai zinga mi Spain chuan zaninah an match hmasa ber an khel dawn a, zanin dar 9:30 hian Atlanta-ah Cape Verde an hmachhawn dawn. An inkhelh hun hi Asia khawmualpui tan pawh en nuam tawk vel a ni a, khawvel mipuiin European champion Spain inkhel an thlir dawn.

Spain an ṭha

Spanish player-te an dam kim thawkhat a, hliam nei awmchhun Osasuna forward Víctor Munoz pawhin training a zawm leh tawh. Tun season tawp lamah Spanish player te an inhliam nasat avangin, World Cup inbuatsaihna-ah buaina an tawk hman ṭep.

Mikel Merino leh Fabián Ruiz te pawh hliam vangin an dinhmun a chiang lo hman a, tlarhma lama an innghahna tur Lamine Yamal pawh World Cup a khelh theih nan Barcelona tan league match tawp lamah a inlan lo. Yamal hi Euro 2024-a a kawppui Nico Williams nen Spain hmachhuan ber an ni leh ang.

Kum 18 mi Yamal hian Spain chu an World Cup title pahnihna laksak turin an beisei dawn a, a kum a naupang mah se a koah an innghat thui dawn. Spain hian kum 2010 khan South Africa-ah an lo champion tawh a, hetihlai hian Yamal hi kum hnih mi lek a la ni.

Tlarhmaah Alvaro Morata a awm tawh lo a, Mikel Oyarzabal hi a hmawr bawktu ni tura ngaih a ni. Kum 29 mi Oyarzabal hi player langsar ber ni lo mah se Real Sociedad captain a ni a, ram tan match 53-ah goal 25 khungin friendly match hnuhnung bera Peru an hneh ṭumin goal hmahruai a khung.

Coach Luis de la Fuente-a'n mipui barakhaihin squad-ah Real Madrid player a ko lo a, hei hian sawi zui a hlawh hle. Player a koh dan vang ringawt pawhin khawvel mipui en ngaihven an ni tawh a, chutihrualin Spain hi 2010 World Cup-a an champion hnuah round of 16 an la paltlang leh lo a, kuminah a aia sang a thlenpui a tum ang.

Team thar

An ram chanchina a vawi khat nan World Cup khel turin Cape Verde an tling a, qualifying khelh a nih lai thleng pawhin tling tura rin an ni lo. Mahse qualifying-ah beisei phak bakin an khel ṭha a, African ram zinga langsar Cameroon 3-0 in an sawp a, group leader nin chungin an tling.

Player langsar kawl tam lo mah se qualifying-ah vawi khat chiah an chak loh avangin team thawhhona a ṭha tih a hriat. Villarreal defender Logan Costa leh Benfica defender, Sidny Lopes Cabral te chu tlarhnungah an innghahna an ni dawn a, Istanbul Basaksehir forward Nuno da Costa chu an innghahna tur a ni dawn a, club lian danga khel an kawl meuh lo.

Cape Verde tan World Cup an khel phâk ringawt pawh hi inchhuanna tham a ni tawh a, chutihrualin friendly match an khelhah Iran leh Egypt chu penalty shootout-ah hneh lo mah se hun pangngaiah an inhnehtawkpui thei a, Serbia leh Bermuda 3-0 a an hneh bawk avangin Spain a hlau bik lo ang.