Khawbelin PVL final an lut

Mizoram Rural Bank Pro Volleyball league khelh mekah Nilaini zan khan, Khawbel chuan 22-25, 25-16, 25-18, 25-17 (3-1) in champion lai Anastasia Electric Veng an hneh a, Mizoram volleyball inelna sang berah vawi khat nan final an lut.

PVL hi LPS Arena, Falkland-ah khelh a ni a, mipa final hi June 13, Inrinni hian Hunthar leh Khawbel ten an khel ang. A hmuna inkhel en man hi Rs. 50 a ni a, LPS YouTube Channel-ah (member only) a en theih bawk.

A vawi khatna

Champion lai Anastasia chu set khatnaah a chungnung zawkah an ṭang nghal a, an player pawimawh Karthik Mandhu hoin an khel khel ṭha nghal. Khawbelin pawh khel chhia tia sawi tur ni lo mah se tihsual an ngah a, point thum chauha inthlau chungin set khatna an hloh.

Khawbel an muhil rei lo a, set hnihnaah an insiamṭha nghal. An coach Eric Pautu chuan ho thei lo mah se an za phah lo a, Angamuthu Ramaswamy hoin Anastasia an bei let. Khawbel an khelh ṭhat bakah Anastasia an inthlahdah a, set hnihnaah point 16 chiah an hmu a, Khawbelin set hnihna an la.

Set thumnaah Angamuthu bawk a langsar a, a ball hmuh apiang a vuak tlak zel theih laiin, Electric Veng club-in an chhang let ve thei lo. Angamuthu hian hian vawi 43 vawi talin point 10 chiah a hloh a, Kuriz Player of the Match-ah thlan a ni zui.

Set lina an ṭan hnuah 8-4-in Khawbel an san laiin an innghahna Angamuthu chuan a vaw kai lo a, Anastasia tan nawr let theihna remchang a nih laiin Helly Vanlalliana'n ho takin a service dik lo a, hlauhthawnnain player tibuaiin an ball khawih a nep a, champion lai an ni tih rin harsa khawpa an khelh ṭhat tawk loh avangin, anmahni ṭantute thawm a zawi ṭan.

Khawbel erawh an khel ṭha chhunzawm zel a, harsa tura ngaih pawh Angamuthu chuan a vaw thei zel a, Johan Vanneihsanga'n a thlawp ṭha bawk. Johan-a'n a vuak tlak hnuah 24-16 in an sang a, Karthik chuan vawi khat dang thei mah se Helly-a'n a service sual a, Khawbel tan final luhna kawng a hawnsak.

Huaisen rah

An duhthusam tihlawhtling turin Khawbel an insengso a, Delhi player Anurag Rawat kawl reng chungin state pawn aṭangin Angamuthu an lak belh a. Angamuthu awm hnuah Khawbel an ṭha lehzual a, Angamuthu hian match thum a khelh tawhah player of the match lawmman a la dawng vek.

Khawbel captain Johan-a'n hma a sawn bawk a, vawi 15 hlap tlain point ruk a paih a, Electric Veng team tana khel ṭha ber Karthik aiin point khatin a hmu tam a, an hloh zat a inang. Mimal chet dan a inthlauh avangin team-ah nghawng a nei a, Anastasia-in an set hnihna aṭangin Khawbel an ngam lo hle.

Beiseina thamral

Anastasia-in nikuma champion puitu Karthik-a hovin bul an ṭan a, league vawi thum an khelh hnuah mimal thil pawimawh avangin a hawsan.

A hmun ruak luah tura an lak Kush Singh an chet ṭhatpui tawk lo a, an khelh hnuhnung vawi hnihah tlawm zawnin an talbuai a, league-ah pathumna luahin Khawbel hnuaia awm chungin an tlang a, semifinal atan inbuatsaihna hun awl ni 12 an nei.

Mahse Anastasia-in semifinal-ah beisei an pha lo a, set la hmasa mah se Khawbel an inlehthaltir avangin, season zawna champion an beiseina chu a thamral.