Zanin dar 8:00-ah PVL hmeichhe final; Tuichangral vs Chhinga Veng Spikers

Pro Volleyball League-a a vawi khat nan kuminah hmeichhe inelna telh ve a ni a, team li telin zanin dar 8:00-ah Tuichangral leh Chhinga Veng Spikers ten nomawi an inchuh dawn.

Tuichangral an ṭha

League round-ah Tuichangral hi hmahruaitu ni chungin final an lut a, chak loh nei loa kaltluang lai an nih avangin an inringtawk khawp ang. Tuichangral hian Tamil Nadu aṭangin Shaalani Saravanan an la lut a, Shaalani hi an innghahna a ni.

Shaalani bakah Lalramliani a awm bawk a, Rami hi Shaalani nen an inthlawp ṭha thei hle. Match hnuhnung bera Eric Pautu Academy an hneh ṭuma che ṭha tak Remlalnghaki leh VL Hmangaihzuali te an la nei bawk a, champion an tum a nih chuan Shaalani bakah Mizo hmeichhiate an chet ṭhat leh a ngai dawn.

Spikers an duai lo

Chhinga Veng Spikers pawh vawi khat chauh chak loin pahnihna an ni a, league round khar nan ITI Veng GSA chu harsatna tawk loin an hneh. Spikers tan Kerala aṭanga an lakluh Anusree Poyili chu an hmachhuan ber a ni dawn.

India captain pawh lo ni tawh Anusree hi Mzio spiker ṭha ber pawl Elisian Medai chuan a thlawp leh dawn a, league round lama che ṭha Evelyn Malsawmtluangi leh Lalbiakngheti bakah setter ṭha F. Lallianchhungi an neih bawk avangin Tuichangral lakah an zam dawn lo.

Team pahnihte hi league round-ah an lo inhmachhawn tawh a, set thum la zawnin Tuichangral an chak a, hnehna chang turin harsatna an tawk lo. Khatih lai khan Spikers tan Anusree a la inlan lo a, mahse Tuichangral tan Shaalani a khelh bik loh avangin chhuanlam atan hman a rem lo.

Nikum September khan Pro Division season hawnna tournament final-ah, set thum set khatin Tuichangral hian Chhinga Veng an lo hneh tawh a, champion nomawi an chawi zui. Chhinga Veng tan hian tun season PVL-ah an hneh loh chhunzawm avangin, zaninah chuan hneh ngei an tum tawh dawn a, final a nih avangin an tan phuba lakna hun ṭha a ni.