A thlengtu Canada hmaah Bosnia-Herzegovina

FIFA World Cup-ah zanin dar 12:30 hian inelna thlengtu zinga mi Canada-in BMO Field, Toronto-ah Bosnia-Herzegovina an hmachhawn dawn. Club pahnih hi tun hmain an la inhmachhawn ngai lo a, tun ṭum hi an vawi khat intawnna tur a ni.

Canada leh Bosnia-Herzegovina te hi group B-ah Switzerland leh Qatar te nen an awm ho. Ranking sang ber Switzerland hian World Cup-ah quarterfinal ṭum thum an thleng tawh a, team dang pathum erawh group stage hi an thlen san ber a ni a, kumin inelnaah second round lut an awm dawn.

Inelna thlengtu Canada hi coach Jesse Marsch hnuaia khel tur an ni a, American coach hian New York Red Bulls-ah hming chherin Red Bull Salzburg leh RB Leipzig bakah Leeds United te a enkawl tawh. Chutihrualin Canada hian qualifier an khelh ve loh avangin an dinhmun tur hriatthiam a har hle.

World Cup ṭan hma friendly match vawi hnih an khelhah Uzbekistan 2-0 in an hneh a, Republic of Ireland nen an inhnehtawk bawk. Friendly match hnuhnung 10-ah vawi khat chiah an chak lo a, vawi li chakin vawi nga an inhnehtawk.

Canada hian tlarhmaah ram tana goal 39 khung tawhtu Jonthan David an nei a, Juventus forward bakah hian Bayern Munich defender ṭha mi Alphonso Davies a awm bawk. Chutirhualin Davies hi malpui hliam dam hlim a nih avangin match hmasa berah a inlan a rinawm lo zawk. An player 26 zingah pakua hi MLS-a khel an ni a, player dang zawng hi Europe khel an nih avangin an tawh a khirh viau ang.

Bosnia-Herzegovina hian World Cup khel turin Wales leh Italy an pet tla a, March thlaa playoff an khelh avangin inbuatsaih ṭha tak an neiah a ngaih theih. Mahse, coach Sergej Barbarez hote hian playoff-ah minute 90 chhunga chak an nei lo a, World Cup ṭan hmaa friendly match ṭum hnih an khelhah pawh team nem North Macedonia leh Panama an hmachhawn ṭumin an inhnehtawk tho.

Chutihrualin captain Edin Dzeko-a'n a la ho thei a, Manchester City striker hlui hian ram tan match 148 khel tawhin goal 73 a khung tawh. An coach Barbarez hi an ram football legend a ni a, Bayer Leverkusen striker hlui hi ram tan goal 17 khung thei a ni.

Tlarhnungah Arsenal defender hlui Sead Kolasinac a pawimawh dawn a, tlarhma lamah German club VfB Stuttgart forward Ermedin Demirovic a pawimawh thung ang.