US-ah Somali referee zin phal lo

Somali zinga World Cup referee hmasa ber tur Omar Artan chu United States-a luh an phalsak loh avangin kumin inlenaa official tur zing aṭanga paih a ni.

2025 Confederation of African Football referee ṭha bera thlan Artan hi Miami International Airport-ah dan a ni a, tunah Turkey-ah a awm mek. US immigration thuneitute chuan Artan hi an rama a kir leh chhan tur engmah an tarlang lo a, mah se Donald Trump-a kaihhruaina hnuaiah Somalia-a chengte hi US-a zin khap zinga mi an ni.

US thuneitute nena inbiak hnuah FIFA chuan Artan chu tun inelnaa official tur zing aṭangin an paih. FIFA chuan, "United States-a luh phalsak a nih loh avangin match official tur zinga mi Omar Abdulkadir Artan-a'n FIFA World Cup 2026-ah match a kaihruai thei dawn lo.

"Visa pek chungchang leh ram dang mi luh phalsak chungchangah hian FIFA-in inrawlhna a nei lo a, Artan-a pawh hi thuneitute hnen aṭangin a dinhmun thlak danglam a nih loh tur hi hrilh a ni tawh.

"FIFA-in inelna a buatsaih ṭhinah hian, visa pe tur leh an ram chhungah tute nge luh phalsak ang tih chu inelna thlengtu sorkar thu thu a ni a, anmahni kutah a awm ṭhin," tiin thuchhuah an siam.

FIFA hnuaia referee hotu Pierluigi Collina kaihhruaina hnuaiah referee 52 leh assistant referee 88 ten Miami-ah training neiin an inkulh a, official zawng zawng hi Florida-ah inbuatsaihna an neih avangin Artan tan United States pawn lama inkhel kaihhruai pawh a remchang lo.