Iran-in ticket dawng dawn lo

Football Federation Islamic Republic of Iran (FFIRI) thuchuahin a tarlan danin an ram fan-te tana World Cup inkhel en theihna tur an dawn ṭhin chu pek an ni dawn lo a, inelna ṭan nana ni tlemte chauh a awm tawh avangin United States thutluknaah an thinur hle.

FFIRI chuan, "2026 World Cup ṭan nan ni thum chauh a awm tawh tihah inelna thlengtu Untied States chuan infiamna thila kalphung pangngai pelin thutlukna an siam. Group stage-a kan team match thum khel en theihna ticket chu min tihtawp sak.

"FIFA-in dan leh kalphung a siam angin, match tinah ram telte tan ticket 8% pek an ni ṭhin a, hei hi ram tin fan-te'n an federation nena inthurualin ticket an lei theih nan a ni. Nimahsela, mak takin Iran Football Federation quota chu sut a ni a, tun dinhmunah phei chuan federation kaltlangin fan pakhat mahin ticket an lei thei tawh lo.

"Hei hi Iranian football ngainatute'n tournament en tura ruahmanna an siam fel vek tawh hnuah a thleng a, official-a hriattirna an chhuah tawh chu an ring a ni. Iranian fan-te ticket lei thei tura chanvo an neih sut sak hi inkhelh khawvel football khawvel tan a ṭha lo a, ram inelnaa intluktlanna a kalh bawk. He thil thlengah hian infiamna nena inkaihhnawih lo leh politics thil avanga khawvela football inelna lian ber ruahmanna hnuaia inrawlh a awm em tih zawhna lian tak a awm nghal," tiin thuchhuah an siam a, World Cup hmel a hem loh nan FIFA chu hma lak turin a ngen tel bawk.

Iran ṭantu sang chuangin World Cup en tumin thlawhtheihna ticket leh thlenna hotel thlengin an 'book' lawk tawh a, United States thutlukna avang hian an ruahmanna a buai vek dawn. Chutihrualin Iran leh United States inkar ram buaina vangin harsatna awm tur hi a hmuh thiam lawk theih.

Kumin March thla khan US president Donald Trump chuan, "Iran football team-te chu World Cup-ah kan lawm a, mahse an nun leh himna atan helai hmunah an awm a ṭha ber kher lo ang. He thil chungchang inngaihtuah avangin ka lawm e!" tiin a sawi tawh a, US-a inkhel tur Iran team hi Mexico-ah an innghat daih.

Iran football team hi Tijuana, Mexico-ah an innghat a, an inkhelh niah US an pan ang a, an chhuahsan lehnghal bawk dawn. Group G-ah New Zealand, Belgium leh Egypt te nen Iran hi an awm ho a, Los Angeles Stadium-ah ṭum hnih an inkhel ang a, Seattle Stadium-ah an inkhel bawk dawn. Zin vei vahna vang ringawt pawh hian Iran tan group stage patlang a harsat phah sawt ang.