French Open hmeichhe champion Andreeva

French Open hmeichhe final-ah Mirra Andreeva chuan Inrinni zan khan Maja Chwalinska 6-3, 6-2 a hnehin a vawi khat nan Grand Slam-ah a champion. Tennis legend Monica Seles (1992) hnua Coupe Suzanne Lenglen chawi thei naupang ber a ni a, Russian tleirawl hi kum 19 mi chauh a ni.

Polish nula Maja Chwalinska erawh final-ah vanduai mah se qualifier aṭanga bul ṭan a ni a, final hial a thlen bakah a nungchangin ngainat a hlawh avangin tun ṭum inelna aṭangin sum a lakluh hnem bakah hming a chher viau bawk.

Final chu

Court Philippe-Chatrier-ah entu 15,000 bawr vel an pung khawm a, mi lar Brad Pitt, Emma D'Arcy, Rebel Wilson, Richard Gadd leh Flea te pawhin inkhel hi an thlir. Darkar khat leh minute 22 chhung chauh khel mah se inkhel ṭantir lam a nung ṭha hle.

Entu tam zawkin Maja an ṭan zawkah a ngaih theih a, mah se seeded no. 8 Andreeva-i'n a serve a laksak nghal. Mahse, Maja pawhin Andreeva serve laksak ve lehin Russian tleirawl pawhin pressure a nei tih a hmuh theih.

Game hnihna leh thumnaah pawh serve an inlaksak tawn ve ve a, final boruak la tem ngai lo pahnih inkhel a nih avangin finalist pahnihte an demawm loh. Game nganaah Maja-i'n a serve a la ta a, mah se theihna sang zawk Andreeva pawh a insiamrem.

Andreeva hian Maja hi serve laksak lehin a hawikir tawh lo a, set khatna 6-3 in a la. Set hnihnaah erawh Andreeva a chungnung hlak tawh a, qualifying round aṭanga khel ṭan Maja-i'n thahrui a ngah tawk tawh lo.

Russian tleirawl hian 5-0 in hma a hruai a, set hnihna hi nuam sa takin 6-2 in a la zui bawk. Andreeva hian 'forehand' hmanga hnehna tur point a vuak zawhah a ṭhingṭhi nghal a, a tum ram a thleng. A vawi khat nan Grand Slam-ah a champion.

A ropui e

Andreeva hi Maria Sharapova-i'n kum 2014 French Open-a a champion hnua Russian tennis player zinga champion leh thei hmasa ber a ni a, kum 19 mi chauh a ni.

Kum 34 liam ta khan Monica Seles chuan set thum chhunga Steffi Graf hnehin a champion a, Seles hnua teenager (kum 19 chin) champion leh thei hmasa ber a ni.

Hmeichhe inelnaah world no. 1 Aryna Sabalenka hming langsar viau mah se tumahin hmeichhe tennis inelna an thunun thei rih lo. Grand Slam hnuhnung parukah mi hran vek an champion.

Kumin French Open-ah Andreeva a champion a, Australian Open-ah Elena Rybakina a champion. Nikum Grand Slam-ah mi hrang hlak pali Madison Keys (Australian Open), Coco Gauff (French Open), Iga Swiatek (Wimbledon) leh Aryna Sabalenka (US Open) an champion bawk.