Keima chungah ka lawm - Andreeva

Kumin French Open hmeichhe champion Mirra Andreeva thusawi lar tak chu, "Keima chungah ka lawm," tih hi a ni a, Nike kut chhuak a jacket-ah pawh a inziak. Grand Slam-a a champion hmasak ber zawhah pawh Andreeva hian ama chunga a lawm thu a rawn zep tel leh bawk.

Kum 19 mi Andreeva chuan, "Kar hnih chhung Paris-a min ṭawiawmtute chungah ka lawm a, nitina min thlawpna hi ka tan a pawimawh em em a ni. Paris hi ka tan chuan a hlu em em a, player tute pawhin inthlawp ṭhat avangin ka ngaina che u," tiin lawmthu a sawi.

Russian tleirawl chuan sawi chhunzawmin, "Keima chungah ka lawm. Keimaha ka inrintawkna te, hun harsaah pawh theihtawp chhuah tura ka inpekna te, ni tina player ṭha zawk ni tura ka beihna te, ka beisei ang te tihlawhtling tura keimah ka inrintawkna te avangin keima chungah ka lawm. Ka harsatna tawh leh kar hnih chhunga ka hlauhthawnzia te hrechiangtu chu keimah hi ka ni a, chuvangin keimaa ṭha ber ka pek avangin ka chungah ka lawm hle a ni," a ti.