PFA Award-ah Arsenal langsar

English football-a mimal chawimawina ngaihhlut hlawh ber Professional Footballers' Association men's player of the year award dawng thei tur hming chhawpchhuah a ni ta a, Premier League champion Arsenal-in player pathum an thawh.

Gunners player-te hi midfielder pawimawh Declan Rice, defender Gabriel leh goalkeeper David Raya te an ni a, player dang pathum chu Manchester khaw club-ten an thawh.

Manchester City striker Erling Haaland leh midfielder Rayan Cherki te chu award dawng thei zingah an tel a, Manchester United captain Bruno Fernandes hming lam tel a ni bawk.

Bruno hian season hman zawh takah khan EPL bikah assist 21 neiin, Premier League-a season khata assist ngah ber record a siam - Football Writers' Association chuan men's footballer of the year atan an thlang a, Premier League player of the season a ni bawk.

Portuguese midfielder hian PFA Award pawh hi a dawng leh lo ang tih a sawi theih loh - award hi August 25-ah semchhuah chauh tur a ni a, World Cup zawh lamah an sem dawn chauh tihna a ni.

Season hmasa khan Mohamed Salah chuan he award hi dawngin, a vawi thum dawnna a ni a, Liverpool forward chhuak ta hi he award dawng ngun ber niin, vawi hnih dawng thei erawh an awm nual.