Liverpool coach thar Andoni Iraola

Arne Slot duhkhawp loa bantu Liverpool-in coach langsar leh ropui lam aiin coach hmabak nei êng lakluh an thlang a, season hman zawh taka an hnuai chiaha awm, Europa League khel tura Bournemouth hruai kaitu Andoni Iraola chu coach thar turin an la lut.

Spanish coach hi Reds hian kum hnih atan contract an ziahpui a, kum 43 mi hian a coaching career-ah kum hnih zela contract ziah hi tihdan phunga an neih sa a ni pakhat - Reds tan 'risk' a tlem sawt ti pawhin a sawi theih.

Iraola chuan, "Ka phur takzet. Liverpool-te chu tuin nge hre lo ang? He club hi club lian tak a ni a, khawvela club lian ber pawl a ni," a ti a, a coaching career-a club lian la enkawl ngai lo coach hian Cherries-a contract thar a lo ziak lo kha tifuh a inti tawlh tawlh ang!

Spanish coach hi Bournemouth a chhuahsan dawn tih a chian hnuah Crystal Palace leh AC Milan te pawhin lakluh tumin an dawr a, mahse, indawrna a kal mek laiin Liverpool an lo lang - Anfield lam panin a puanthuah a tel ta vut a, Reds coach thar a ni ta.

Manager aiah coach

Liverpool coach ropui chhuak ta Jurgen Klopp kha 'manager' a ni a, Reds-a transfer lut leh chhuakah pawh thutawp siamtu a ni. Mahse, Klopp a chhuah hnuah Liverpool thuneitu lamin transfer thlenga thutawp siamtu nih an duh a, Arne Slot kha head coach angin contract an ziahpui.

Slot hian Klopp angin transfer lut leh chhuakah thuneihna tawp a nei ve ta lo tihna a ni a, 'a thurawn an la ve ṭhin' tih ang chauh a ni a, khelmuala player khelh danah chauh thuneihna tawp a nei.

Reds-in Iraola an lakluh thu an puannaah, manager ti loin, head coach an ti a, Spanish coach pawh hi Klopp anga thuneitu ni loin Slot anga hotute thua awm tur niin a lang - Liverpool tan a ṭha ber em, tih erawh hunin a hril zel ang.

Iraola hian Bournemouth lama a assistant pahnih, Tommy Elphick leh Shaun Cooper te chu Merseyside club-ah hian chhawm luh a duh nia sawi a ni a, coach pahnih hi Cherries-a a hlawhtlin nan an thawhhlawk hle.

Liverpool chu Liverpool

Iraola-a'n Liverpool-in an duh tih a hriat rualin khaw dang a hawi loh thu a sawi. Spanish coach chuan, "Liverpool-a luh châk tur hian thil tam tak a ngai hran lo. Liverpool chu Liverpool a ni tawp mai a, chu chu a tawk em em a ni," a ti a, a club thar a dah sang hle.

Spain international hlui chuan sawi zawmin, "Hmun thara ka awm tak avang maiin, ka rilrua awm apiang ka tiam thei lo che u. Mahse, eng ang club nge ka zawm tih hi ka hrechiang a, ka laka beiseina an neih dan tur pawh ka hrechiang," a ti a, Reds chu club lian a nih avangin a lakah beiseina sang pawh ni se, mak a ti lo.

Iraola hian player a nih laiin Athletic Bilbao-ah a career pumpui deuhthaw a hmang a, a hun tawp lamah Major League Soccer club New York City tana khelin, Frank Lampard, Andrea Pirlo leh David Villa te nen an khel ho a, an coach chu Patrick Vieira a ni.

Spain tan vawi sarih inlanin, major tournament-ah a kal miah lo thung. Iraola-a'n club lian leh ropuiah player leh coach angin tawnhriat a nei lem lo a, tunah Anfield a pan ta. Spanish coach chuan, "Chona hmachhawn turin ka inpeih a ni," a ti a, Liverpool-ah hlawhtlin a tum.

Liverpool fapa

Iraola hi Usurbil, Spain-a piang a ni a, Liverpool khawpui nen chuan inhlat tak a ni. Mahse, Spanish coach hian Reds chhungkaw zinga a hming ziah kai a duh a, an zinga mi anga chhiar tel a duh.

Cherries boss hlui chuan Bournemouth boss a nih laia Liverpool nen, Anfield-a season hmasaa an inkhel a thlirkir a, 2-2 a nih hnuah Reds hian goal hnih khung belh lehin, 4-2 in an chak.

Iraola chuan, "Chiesa-a'n goal thumna a rawn khung a, Anfield thawm rinzia kha ka la hre reng. Tunah chuan kha thawm kha, a leh zawnga hriat ve ka duh tawh dawn a ni," a ti a, Anfield puihna a sawm.

Spanish manager chuan sawi zawmin, "Eng club pawh zawm ila, a tir aṭanga kan theihna kan pholan a ngai. Fan-ten an pawm thlap ni tur pawhin mahnia thawhchhuah a ngai - ka tih vat a, fan-te nen hlim taka hun hlimawm kan tawn chhoh ka beisei," a ti.

Tu nge Iraola chu?

Kum 43 mi Andoni Iraola hi Spain rama piang leh sei lian a ni a, Spanish club tenau Basconia aṭanga a player zinkawng zawh ṭanin, a hnuah Athletic Bilbao reserve team a zawm a, season hnih a khelh hnuah, senior team-ah sawn niin, 2003-15 inkar a khel.

Bilbao aṭang hian New York City a zawm a, season khat leh a chanve a khelh hnuah inkhelh a chawlhsan. Cyprus club AEK Larnaca aṭanga a coaching career zawh ṭanin, Super Cup-ah champion pui mah se, thla hnih dawn chak nei loa an awm hnuah ban a ni.

July 2019-ah Spanish second division kai thar Mirandés zawmin, an club chanchina a vawi hnih nan Copa del Rey semifinal a hruai thleng a, Celta Vigo, Sevilla leh Villarreal te an hneh.

Season khat hnuah Rayo Vallecano zawmin, La Liga a kaipui a, Spanish top flight league an khelh hnuah Copa del Rey semifinal a hruai thleng bawk. June 2023 khan Bournemouth a zawm a, an club chanchina a vawi khat nan, season hman zawh takah Europa League a hruai thleng.

Tunah chuan English club lian Liverpool coach a ni dawn ta a, Iraola chungah beiseina a san chhunzawm ang.