Champion thar awm dawn

French Open mipa final chu June 7, Pathianni zan hian khelh a ni dawn. Nizan khan semifinal-ah seeded no. 2 Alexander Zverev vs Jakub Mensík leh Italian player pahnih seeded no. 10 Flavio Cobolli vs Matteo Arnaldi te an inhmachhawn a, result kan hre hman lo.

French Open hi clay court-a khelh a nih avangin clay court khel thiam bik Rafael Nadal a langsar ṭhin a, inelna hnuhnung pahnihah Spanish player tho Carlos Alcaraz a champin leh ve ve bawk. Mahse, tun ṭumah hliam vangin Alcaraz a tel thei lo a, world no. 2 Jannik Sinner tan champion-na hun ṭha ni mah se Italian tennis star hian hun ṭha a bawhpelh.

Semifinal khel palite hi la champion lo vek an nih avangin champion thar an awm dawn a, player pali zinga hming langsar ber chu Alexander Zverev a ni. German tennis star Zverev hian Olympic-ah gold la tawh mah se Grand Slam inelnaah a la champion lo.

Kum 29 mi Zverev kum 2024-a French Open final a luh hnua final a luh leh thei a nih chuan Grand Slam champion-na hun ṭha hi a bawhpelh loh a pawimawh ang. Hun ṭha a bawhpelh a nih erawh chuan kum 29 mi a nih tawh avangin tennis player ṭha tak ni siin Grand Slam nomawi chawi miah lo thei dinhmunah a ding thung.