Man City -in Real khin an tum

Premier League club Manchester City chuan Real Madrid president chuhtu Enrique Riquelme-a'n City aṭanga Erling Haaland lakluh a tum thu a sawi chu an ngai haw hle a, dan anga hma lak an tum.

Real Madrid hian June 7, Pathianniah club President thar tur an thlang dawn a, President ni lai Florentino Perez leh Enrique Riquelme ten Spanish club hotu lu ber nih hi an inchuh dawn a ni.

President nih tum pahnihin, club tana an hmachhawpte an pholang a, kum 37 mi Riquelme hian Haaland lakluh a tum thu a sawi. Riquelme hian television lama a inlannaah, Haaland-a hming chuanna jersey pawt pharhin, Norwegian striker hi lak a tum thu a sawi.

Riquelme chuan, "Haaland hian a contract-ah chhuah theihna dan a ziak tel a, Real Madrid zawm a châk. Real President ka ni thei a nih chuan Real Madrid tan a khel ang," a ti a, club member 100,000 chuangten an vote duh nan Haaland hming a lam ri.

Riquelme thusawi avang hian Haaland agent Rafaela Pimenta leh Haaland-a pa Alfie Haaland te chuan thuchhuah siamin, "A hlimawm khawp mai. Mahse, thudik a ni lo a, Real President nih tuma in candidate te pahnih pawh duhsakna kan hlan a ni," an ti.

City chuan, "Haaland-a hma hun chungchang, Spain-a an sawi hi thudik tawk lo a ni a, engti kawng mahin he thil hi a thleng thei lo a, contract-ah pawh engmah a awm lo.

"Kan player hming hawh a, hetianga hmalakna awm hi pawi kan ti hle a, dan anga hma lak dan tur kan ngaihtuah a ni," an ti a, an lawm lo hle.

Riquelme hian Real Madrid nena sawi zawm hlawh mek Rodri chungchang pawh sawi riin, lakluh a tum ngei thu a sawi. Spanish sumdawng hausa chuan, "Rodri agent-te nen kan inbia a, Real-in inthuam chak kan ngaihna laia kan mamawh tak a ni.

"A agent kan be tawh. Mahse, a club khelh mekna kan zah a ngai a, Real President ka nih erawh chuan Madrid tan a khel ang. Ka tih theih apiang ka ti dawn a ni," a ti a, City tan Riquelme-a'n an player chhuanvawr pahnih hming a lam ri hi a lawmawm lo ngawt ang.