One Championship-ah Nazareth inlan leh dawn

Khawvel huap pawha multinational combat sports promotion ngaihven hlawh, ONE Championship-ah Mizo tlangval Nazareth Lalṭhazuala a inlan dawn a, zanin hian One Friday Fights 157-ah fight a nei dawn.

Zemabawk East tlangval Nazareth-a hian strawweight-ah Jhon Brutas a hmachhawn dawn a, a hmachhawn tur hi Philippines lam mi niin, vawi sarih professional fight a hmachhawn tawhah vawi khat chiah a la tlawm - a awlsam dawn lo.

The NorthStar hminglem an pek Nazareth-a hi ngaihthah theih a ni bik lo. Professional fight vawi sarih hmachhawn tawhin, tlawm a la nei miah lo a, One Championship hnuaia fight vawi hnih a hmachhawn tawhah a la chak ve ve bawk.

Lumpinee Stadium, Bangkok-a fight turah pawh Mizo tlangvalin tlawm a duh dawn lo a, hnehna hlado chham leh ngei a tum dawn - UFC Athlete Development vice president Forrest Griffin chuan, "Kan lo en thla reng ang," tiin Nazareth-a chungchang hi a coach-te hnenah a lo sawi tawh.

UFC flyweight champion Joshua Van pawhin Mizo tlangval hi duhsakna hlanin, "A ṭha thei ang bera khel turin duhsakna ka hlan che a ni," a ti a, Nazareth-a a phur phah sawt dawn tih a chiang.

Nazareth chuan, "Mizo mipuite ka fight min lo ensak a, ṭawngṭaina lama min lo hre vek turin ka sawm che u a ni," a ti a, "Ka phur tawh takzet," tiin Vanglaini a hrilh bawk. Zanin dar 7:00-ah fight hi chhuah ṭan tur niin, Star Sports Select 2 leh JioHotstar-ah en theiha pekchhuah a ni ang.