Ferrari-ah Leclerc a nghet

Charles Leclerc chuan a awm mekna team Ferrari-ah contract thar a ziak a, a contract rei zawng hi kum hnih niin 2028 season tawp thleng Ferrari-ah a awm dawn.

Kum 28 mi Leclerc hian 2019-a Ferrari a zawm tirh aṭangin a che ṭha nghal a, inelna 155 zet tlan tawhin vawi riat a chak tawh. Ferrari tana F1 driver zingah tlan hnem ber pahnihna (27) a ni a, pole position chang hnem ber dawttu niin, Michael Schumacher (58) chiah a tluk lo bawk.

Leclerc chuan "Ferrari nen zinkawng kan chhunzawm thei tur hi ka hlim a, he team hi ka tan chuan team satliah a ni ngai lo. Naupang ka nih lai aṭang tawha ka ngaihsan leh ka lo tel ve châkna a ni a, ka chhungte pahnihna ang hialin ka ngai tawh a ni.

Hlawhtlinna ropui tak tak leh hun harsa te pawh kan lo paltlang tawh hlawm a, mahse he team hi a hma aiin nuam ka ti lehzual. Maranello (Ferrari inpui)-ah World Championship la let leh ngei tura kan thawk dun thei hi ka lawm hle a ni," a ti.

June 7, Pathianni hian Monaco Grand Prix ṭan a ni leh tawh dawn a, Leclerc hi Monaco ram leilung chhuak a nih avangin a inringtawk a, a phur tawh bawk. Ferrari car leh Monaco-a an tlanna tur 'Circuit de Monaco' hi team dang aia a inmil avangin an chak mai ringtu an tam.

Tun season-ah Mercedes an kal fawr a, race panga awm tawhah an la chak vek. Hetiang a nih avang hian Leclerc bakah hian a teammate Lewis Hamilton lakah beiseina a sang dawn. Hamilton hi Canadian GP-ah khan pahnihna niin Andrea Kimi Antonelli a chiah a tluk lo a, Ferrari a zawm hnua a thlen san ber ṭum a ni bawk.