Saibari leh Bayern an inhnaih

German champion Bayern Munich chuan PSV Eindhoven forward Ismael Saibari an la lut hnai tawh a, mimal thilah inrem tawhin Moroccan forward hi Bayern-ah a lut dawn.

Season hman zawh takah khan Saibari hian PSV tan, inelna hrang hrangah goal 19 khungin assist pakua a nei a, AFCON khelh zawh takah khan Morocco tan player pawimawh a niin match sarih a inlan a, goal khat a khung bawk.

Bavarians-in an tlarhma tihchak nan player thar an melh a, an hel lai Anthony Gordon chu Barcelona-in an chan tak avangin Saibari lam an hawi a, mimal thilah Bayern leh Saibari hi inrem tawh mah se transfer fee tihfel a la ni lo a, Saibari man a tlawm dawn lo.

Kum 25 mi Saibari hi Europe club langsar ṭhekhat pawhin an ngaihven ve a, mahse amah ber hian Vincent Kompany enkawlna hnuaia khelh a châk a, midang hnarin Bayern pan a thlan nia sawi a awm.

Nizan khan World Cup atana inbuatsaih nan Morocco chuan Madagascar an hmachhawn a, 4-0 a chakin an goal hmasa pahnih hi Saibari-a khung a ni a, Soufiane Rahimi leh Ayoub El Kaabi ten goal khat ve ve an thawk bawk.