Croatia hnehtu Belgium an inpeih

Thawhlehni zan khan World Cup atana inpuahchahna friendly match khelhah, Belgium chuan Croatia 2-0 in an hneh a, Youri Tielemans leh Romelu Lukaku ten goal khat ve ve an khung a, Croatia-in a chhanletna tur an nei ve lo.

'Golden Generation' tih hiala khawvel mipuiin an koh Belgium kha 2018 World Cup-ah pathumna an ni a, tun thlengin nomawi hlawhchhuah an la nei lo. Tun hnaiah Belgium-in indinthar an tum leh a, Eden Hazard, Marouane Fellaini, Vincent Kompany leh Dries Mertens te hun ang kha pha chiah tawh lo mah se Europe club liana khel phak player an ngah a, beiseina an nei sang hle.

Belgium hi Manchester City midfielder hlui, Kevin De Bruyne leh Aston Villa midfielder Youri Tielemans ten an ho thei a, tlarhmaah tawnhriat ngah Romelu Lukaku leh City forward Jeremy Doku te an nei a, si ban nghak turin Thibaut Courtois a la awm bawk avangin sang tak thleng thei an la ni.

Hetihlain hian Croatia pawh tun hma pha lo deuh mah se an chhe bik lo a, Luka Modric leh Ivan Perisic ten an la ho thei dawn a, an kum tam ve deuh tawh mah se an thiam an la theihnghilh lo a, team lian zawk el pha tur khawpin an la thiam.

Anni bakah hian Hoffenheim forward Andrej Kramaric leh La Liga hmanz awh taka goal 17 khung thei Ante Budimir an nei a, tlarhmaah an ngaihtuahawm lo. Mahse Belgium lakah ball chang hnem zawk chungin goal an khung thei lo a, 2018 World Cup anga thlen san an tum a nih chuan goal hmaah an hriam tawk a ngai a ni.