Mourinho thlaktu tur Marco Silva

Fulham manager Marco Silva chuan a chhuak tur thu a tichiang tawh a, an ramah letin Benfica-ah Jose Mourinho a thlak dawn a, Benfica nen inbiakna pawh kalpui tawh.

Silva hian Fulham bakah Premier League club pathum - Hull City, Watford leh Everton te a lo enkawl tawh a, 2021 khan Championship-a an awm laiin Fulham a zawm. Kum nga a enkawl chhungin Premier League-a a kaipui bakah 13-na aia hniamah a la awmpui lo a, a che chhe hran lo.

Hetihlai hian tun hnaiah Real Madrid boruak a chhia a, player te inkarah buaina a awm bawk avangin an buaina chingfel turin, an pu hlui Jose Mourinho an la lut a, Portuguese coach tawnhriat ngah hian Los Blancos team dinthar leh a tum dawn.

Mourinho a chhuak tak avangin Benfica-in a thlahtu tur an melh ve nghal a, manager tam tak zingah Marco Silva an duh ber a, Silva hian tun thla bak Craven Cottage-ah contract a neih tawh loh bawk avangin Benfica tan hun remchang a ni.

Kum 48 mi Silva chuan, "Kum nga chhung kan lo hman tawh hnuin, kan zinkawng chu a lo tawp ta. He hmuna ka lo kal hmasak ber aṭang khan kan hnenah awm tlat turin ka ngen che u a, kum nga liam ta chhung khan ka ngenna chu in tihlawhtling ngei bawk.

Kei leh ka staff-te hian in mi thlawpna hi kan hre reng thin a, engtikah mah kan theihnghilh tawh lo ang. Fulham hi ka thinlungah a awm reng dawn a, engtik niah emaw chuan Craven Cottage-ah hian ka let leh ngei ang." tiin fans a thlah.

Marco Silva-a'n a chhuak dawn tih a chian hnuah Fulham-in amah thlakna tur an melh ve nghal a, Ispwich Town manager Kieran McKenna hming a ri ring ber a, McKenna bakah Tottenham Hotspur coach hlui Thomas Frank leh Chelsea-in an ban tak, Liam Rosenior hming pawh a ri tel.