Semifinal-ah TNT hnehtu Khawbel

Mizoram Rural Bank Pro Volleyball League khelh mekah Thawhlehni zan khan Khawbel chuan 25-23, 20-25, 25-21, 18-25, 15-11 (3-2) in Thutak Nunpuitu Team an hneh a, table mawngphaha awm TNT lakah vanneiin semifinal an lut

LPS Arena, Falkland-ah inelna hi neih a ni a, zaninah Tuichangral leh Sihphir te an inhmachhawn ang. Inkhel hi a hmunah Rs. 50 chauhin a en theih a, LPS YouTube channel-ah (member only) a en theih bawk.

Vanneihna leh Khawbel

An dinhmun tichiang turin Khawbelin chak an mamawh a, a mawnga awm leh tla chiang tawh TNT hmaah chak tura rin hlawh zawk ni mah se inkhel an thunun thei lo.

Awlsam taka chak tura ngaih ni mah se TNT-in beisei loh takin set hnihna an la. Khawbel an insiamṭha hret a, set thumna an la leh nghal a, an chak chhunzawm mai a rinawm. Mahse TNT an ṭang khawng a, set lina an la leh a, beisei ang ngawtin Khawbel an tlang bik lo.

Khawbelin league match hnih khelh tur an la nei tihah, Delhi spiker Anurag Rawat kawl reng chungin Angamuthu Ramaswamy an lak belh a, an tifuh. Mahse TNT hmaah amah thlawptu ber Johan Vanneihsanga'n ṭum dang aiin vuak tlak a harsat a, point 16 a hmuh laiin 11 a paih. A hahchawlh chhunga khel Anurag chuan vawi riat hlap tlain tum nga a tisual bawk a, an khel ṭha tawk lo.

TNT tan Angamuthu dan reng theih a ni lo a, Tamil Nadu aṭanga an lakluh Angamathu hian vawi 45 vaw tlain point 15 a hloh a, Khawbel chakpuiin phu takin Kuriz Player of the Match-a thlan a niin a team a chakpui.

Mangṭha TNT

Beisei tur an nei tawh loh avangin TNT-in boruak zangkhai takin an inlan thei a, inthlahdah loin chak ngei tumin an bei tluan. Mahse feet 6 leh inchi 9-a sang Angamuthu an dan hneh loh avangin chak chunga championship thlah liam an tumna an tihlawhtling zo lo.

Team pasarih inel zingah TNT hi Mizo hlanga khel awmchhun an ni a, an player langsarte an kawl zui theih loh avangin tun season-ah beisei an pha lo. An player kawlte khel chhia tia sawi tur ni lo mah se, TNT vawrh san nan a tawk zo lo.

Vawi ruk an khelhah tum nga an tlawm a, chutihrualin an chak awm chhunah table-a sang ber leh rin hlawh Hunthar an hneh. Khawbel hmaah TNT player ten an theihtawp an chhuah a, mipui tan inkhel hmuhnawm an hlui bakah inkhel a zawh hnuah rimawi kal remin TNT naupang rual pipe band ten team thlah nan ropui takin hun an hmang.