Konate leh Real Madrid indawr

Liverpool nen contract thar chungchanga an inrem theih loh hnuah defender Ibrahima Konate chuan Real Madrid a zawm hnai a, he thuziak i chhiar meuh chuan Spanish club lian hi a zawm fel tawh hial mai thei.

Konate hian season tawp hma khan Anfield-a a cham a rinawm zawk thu a sawi a, mahse, beisei angin indawrna a kal zui lo. Konate leh Liverpool an inrem thei lo a, free transfer-a Reds a chhuahsan tur thu Merseyside club hian Pathianni khan an puang zui.

Liverpool tana match 183 khel Konate hian kum 2021 khan RB Leipzig aṭangin Reds hi pound maktaduai 35-in a zawm a, Premier League, FA Cup leh League Cup (2) ah te champion nomawi a chawipui.

Konate hi Reds nen a contract thar chungchanga an indawr hma pawh khan Real Madrid hian an lo ngaihven tawh a, tunah chuan Santiago Bernabeu lam panin a puanthuah a tel ta nge nge dawn niin a lang.

Liverpool hian season hmasa ṭan dawn khan an right back Trent Alexander-Arnold chu Real Madrid lakah vek an lo chân tawh a, season zawnin pound maktaduai 100 chuang hmuh theihna tur defender pahnih Real lakah a thlawnin an chân tihna a ni.