England number 10 tur Jude Bellingham

World Cup atana thawm nei na tak England chuan World Cup 2026-a an player-te jersey hak tur number an puang a, Real Madrid midfielder Jude Bellingham chuan number 10 a ha dawn.

England boss Thomas Tuchel-a'n Bellingham hi a ngaina vak lo niin media ṭhenkhat chuan an tarlang ṭhin a, hetiang boruak karah hian Real Madrid-in beisei an lo phak lo bawk nen World Cup-a a regular loh mai rinna a lian hman.

Hetihlai hian Aston Villa attacking midfielder Morgan Rogers a lo che ṭha bawk si a, Rogers zawk hi Tuchel-a'n a ring dawn nia sawi a awm. Mahse, number an inpek dan aṭanga teh chuan Bellingham hi bul ṭan tur zawk a nih hmel a, Manchester United leh Arsenal hel lai Rogers hian number 17 a ha dawn.

Manchester City fullback Nico O'Reilly chuan number 3 changin, Chelsea captain Reece James-a'n Blues tana a hak ṭhin number 24 chu England tan pawh a ha dawn a, player pahnih hi World Cup-a Three Lions fullback tur an niin a lang.

City chhuahsan hlim John Stones chuan number 5 hain, Marc Guehi-a'n number 6 a ha dawn thung a, centre back-ah player pahnih hi an inkawp dawn, tiin a sawi theih.

Barcelona-in a ngheta an lakluh dawn leh dawn loh an tihchian theih loh karah Marcus Rashford-a'n coach Tuchel-a rinna a hlawh dawn niin a lang a, number 11 a ha dawn - Arsenal thiampuipa Bukayo Saka-a'n number 7 a ha dawn thung a, tlarhmaah Harry Kane an thlawp dun dawnah a ngaih theih.

City leh Manchester United ten an hel lai, Nottingham Forest midfielder Elliott Anderson chuan number 8 changin, bul ṭan ngei tura ngaih theih a ni a, Declan Rice nen midfield-ah an inkawp ang.