Chwalinska tan beiseina a awm zel

Tun ṭum French Open zet chu beisei loh thil kan hmu deuh reng - nimina hmeichhe quarterfinal inkhelah qualifier Maja Chwalinska chuan hnehna a chang leh ta a, French Open semifinal a inhlapkai ta!

Court Philippe Chatrier-a inkhelah Polish qualifier Maja Chwalinska hian Russian mi, seeded 22-na Anna Kalinskaya chu straight set-in, 7-6 (7-3) 6-3 in a hneh a, world number 114 hian a beisei phak baka sang a thleng ta.

Kum 24 mi Chwalinska hian French Open hmeichhe singles tournament-a qualifier ni chunga inlanin an thlen san ber record chu a nih rual a, khawvel barakhaiha nomawi chawi turin match hnih chak chiah a mamawh ta.

Polish tennis star chuan, "Eng thil nge thleng ta hi ka sawi thiam lo a, match tin mai hi mak ka ti em em tawp mai a ni. Ka hlim takzet a, ka zam em em bawk.

"Zamte hi chu thil thlen dan pangngai ve reng a ni a, mahse, ka hna hlen ngei tumin ka rilru ka ti paukhauh tlat thung. Ka tum ang ngeiin ka hna ka hlen thei hi ka lawm hle a ni," a ti.

Chwalinska chuan sawi zawmin, "Match tinah hnehna chan tumin ka bei a, mahni inrintawk tumin ka buai hran lo. Khawvela player ṭha ber ber ka hmachhawn a, anni nena khaikhin chi ka la ni lo," a ti a, a inngaitlawm hle.

Open era chinah Chwalinska hi tennis major tournament-a qualifier ni chunga women's singles semifinal lut thei parukna a ni a, pakhat chiahin nomawi a la chawi zui - chu chu Emma Raducanu a ni a, US Open 2021-ah khan khawvel barakhaihin a champion.