French Open-a champion thar tur Sabalenka?

Kumin French Open hmeichhe inelnaa la dam zingah champion tawh an awm lo a, world no. 1 Aryna Sabalenka tan hun ṭha bik a ni. Sabalenka hian Thawhṭanni zan khan fourth round-ah seeded no. 16 Naomi Osaka chu 7-5, 7-3 in an hneh a, vawiin quarterfinal-ah seeded no. 19 Madison Keys hnehtu seeded no. 25 Diana Shnaider a hmachhawn ang.

Kum 2023 hnua a vawi khat nan hmeichhe inkhelin Court Philippe Chatrier-ah zan inkhel an chang a, Sabalenka-i'n darkar khat leh minute 27 chhungin Osaka a hneh. Kum 28 mi Sabalenka chuan, "A bul ṭanna chauh ni se, hmeichhia pawhin zan inkhel tam zawk chang thei se a duhawm hle," tiin a sawi.

Osaka pawhin, "Inelna buatsaihtuten zan inkhel chang tura min thlan avangin ka lawm a, zan lamah hmeichhe inkhel kan hmuh chhunzawm zel ka beisei," tiin a sawi ve bawk.

Sabalenka hian nikum khan French Open final a lut a, Coco Gauff lakah a vanduai. Belarusian player hian Australian Open leh US Open vawi hnih ve ve chawi tawh mah se French Open leh Wimbledon-ah a la champion lo a, tun ṭum inelna hi a ngai pawimawh lehzual ang.

Vawiina Sabalenka khingpui tur Diana Shnaider tan erawh tun ṭum hi Grand Slam inelna hrim hrim a, quarterfinal a luh hmasak ber tur a ni a, a khingpui tur hi world no. 1 a nih avangin semifinal luh erawh a harsa dawn. Quarterfinal inkhel pakhat zawkah seeded no. 22 Anna Kalinskaya leh Polish nula Maja Chwalińska te an inkhel ang.