Pawla awm ve ringawt loin theihtawp chhuah tur - B. Lalchhanzova, Minister

Mizoram Football Association (MFA) chuan nimin khan Aijal Club-ah Annual General Body Meeting an hmang a, khuallian minister B. Lalchhanzova chuan football hruaitute chu pawl a awm ve ringawt lo a, mahni phak tawkah pawl hmasawnna atana theihtawp chhuah turin a chah a, pawl chakna leh hmasawnna chu mimal tina innghat thu a sawi.

MFA inkhawmpui lianah hian kumin 2025-2026 football season liam tura hmalakna hrang hrang an thlir kir a, season thar lo awm tur an thlir lawk bawk. MFA president Lalnghinglova Hmar chuan, "Mizoramin national inelnaah lawmman pakhatna dawng khat ta deuh mah ila, hmasawnna hmuh tur erawh a awm. Final-ah kan vanduai leh ṭhin a, hei mai hi a ni lo. IFL-ah club pahnih kan nei a, ISL-ah Mizo player-ten field chhungah hun an hmang hnem ber a, India leh Jamaica inkhelh ṭum pawhin Mizo pahnihin bul an ṭan," tiin hmasawnna awm thu a sawi a, hmasawnna hi district hrang hranga football association hruaitute leh Zone FA te, MFA thawhpui sponsor leh department hrang hrang te thawhrah a ni tih a sawi bawk.

MFA honorary secretary Lalrengpuia'n annual report a pe a, tun season-ah ringawt MFA hnuaiah inelna chi hrang vawi 30 dawn buatsaih a ni a, national football championship-ah vawi sarih lai team a tirh thu a sawi. Indian Football League-ah Mizo player 63 an inziak lut a, ISL-ah Mizo player 43 an awm thu a sawi a, ISL leh IFL champion team East Bengal leh Diamond Harbour-a Mizo player-te an pawimawh thu a sawi tel bawk.

MFA annual general body meeting-ah hian MFA executive committee member-te bakah District 11-a football association aiawh mi pasarih ṭheuh an tel a ni.