United aiin City-in Anderson an hnaih zawk

Nottingham Forest midfielder Elliot Anderson lalut turin Manchester City dinhmun a ṭha ber a, England international hi kumin nipui bazara City Ground chhuahsan ngei tura ngaih a ni. Manchester United-in Anderson hi duh viau mah se uchuaka sum sen an tum loh avangin an lak luh theih a rinawm loh.

Chutihrualin tun dinhmunah inremna a la awm lo a, City pawisa pekchhuah phal zat leh Forest phalna zat a la inthlau hle. British player man to ber chu Declan Rice a ni a, Arsenal-in kum 2023 khan West Ham United aṭangin £105mtd-in an lalut. Forest-in Anderson hralh an phalna zat hi British record fee aiin a tam zawka ngaih a ni.

Premier League tawp niah Forest leh Bournemouth te 1-1 in an inhnehtawk a, inkhelh zawhah manager Vitor Pereira chuan, "Anderson leh Morgan Gibbs-White te hian a ṭha ber dawn hi an phu. Tun aia tum sang zawk kan nei dawn a nih chuan kan player ṭhate hi kan chelh a ṭul ang. Player kan inthlak reng a nih erawh chuan ngelnghet taka kal a har dawn," tiin a sawi a, nipui bazar hman a ṭhat a ṭul thu a sawi.

Anderson hian 2025 European U21 Championship khan England a champion pui a, kum 2024 khan Newcastle United aṭangin £35mtd-in Forest hi a zawm a, match 92 khel tawhin goal ruk a khung. Cherries an hmachhawn ṭumin tun season-a match 50 a khelhna a ni a, second half-a an lakchhuah laiin mipuite pawhin standing ovation an pe hial.