Kan champion leh thei ang - Kvaratskhelia

UEFA Champions League final-ah Paris Saint-Germain leh Arsenal te May 30, Inrinni zan dar 9:30 hian an inkhel dawn a, European champion zawnna hi khawvel en châk a ni.

PSG hi champion lai an ni a, an player pawimawh Khvicha Kvaratskhelia chuan champion nawn theih a inbeisei thu a sawi. Luis Enrique hote hi Ligue 1-ah an champion a, league match hnuhnung ber pawh May 18, Thawhṭanni zan khan khelin final atan player ṭha te an indahṭha tawh.

Kum 25 mi Kvaratskhelia chuan, "Season liam taa kan champion nen khan danglamna nasa tak a awm tawh. Team takin kan khelh dan an hria a, min dan dan tur an inzir nasa. Keini lamin hneh dan kan hre thei zel a, kan inkhelh turah hian rilru kan pek a ṭul. Champion lai kan ni a, champion nawn a harsa dawn a, mah se kan champion nawn thei ang," tiin a sawi.

Kvaratskhelia hian January 2025 khan Napoli aṭangin PSG hi €70m-in a zawm. Georgian winger hian Serie A-ah Napoli hi vawi hnih a champion pui a, PSG a zawm hnuin Paris club hi Champions League a champion pui. Lionel Messi, Neymar leh Kylian Mbappe te theih loh kha Enrique kaihhruai PSG hian an ti thei a, Arsenal lakah pawh rinkai zawk an ni ang.