Europe inlan tur zawnna Conference League final

UEFA Conference League chu zanin dar 12:30 hian a hmawr bawk a ni tawh dawn. English club Crystal Palace leh Spanish club Rayo Vallecano te an inhmachhawn dawn a, Season hmasa FA Cup champion Palace tan, a kum zawna nomawi chawina hun remchang a ni.

Rayo Vallecano erawh an club chanchina an nomawi chawi hmasak ber a ni thei a, nomawi chawina a nih bakah season tharah, Europe-a inlan theihna a nih avangin chak loh an duh dawn lo a, inkhel hmuhnawm a beisei ngam.

An dinhmun

Tun season-ah Crystal Palace an che ṭha tawk lo a, an player ṭhaten an chhuahsan nasat avangin an result in a tuar a, Premier League-ah 15-naah awmin relegation zone aṭangin point ruk chauhin an him. An coach Oliver Glasner pawhin tun season bak Eagles a enkawl dawn lo tih a sawi chiang tawh.

Conference League lamah pawh an che ṭha tawk lo a, league stage-ah 10-na niin round of 16 lut turin playoff an khelh a ngai. Mahse playoff aṭangin Palace an danglam a, knockout round chinah goal 14 zet an khung. Quarterfinal second leg-a Fiorentina laka an tlawm bak chu hneh loh an tawng lo a, rinkai ni lo mah se final an lut.

Rayo Vallecano erawh La Liga-ah an che chhe hran lo a, pariatna ni chungin season an khar. Mahse season thara Europe-a inlan tur Getafe chu point khat chauhin an pha lo.

Vallecano hi Conference league-ah pawh an ṭha a, league round-ah pangana an nih avangin last 16 an lut tlang nghal. Spanish club hi quarterfinal-ah chak turin vanneihna an mamawh thung a, aggregate-ah 3-3 a nih hnuin goal an khung hlauh, champion an sawi ri ngam tawh ang.

Eagles an ṭha

Palace tan Cheick Doucoure leh Eddie Nketiah te chu hliam vanga khel lo tur chiang sa an ni a, Chris Richards leh Borna Sosa te chu an hliam vangin an inlan dawn leh dawn loh a chiang lo.

Eagles tan midfield-a an khaipa ber Adam Wharton chu, Premier League match tawp bera Arsenal an hmachhawn ṭumin a ke rek a tihnat avangin lakchhuah a ni a, a hliam hi serious angin lang lo mah se a dinhmun a chiang lo. English midfielder hi a awm lo a nih chuan Eagles tan channa nasa tak a tling ang.

Si ban nghak turin Dean Henderson a awm dawn a, a hmaah Maxence Lacroix a ding dawn a, French defender hi club lian chil tiputtu a nih bakah an ram tan World Cup khel tura koh a ni a, Palace tan tlarhnungah hlauhthawnna tur a a awm lo.

Tlarhma lamah Ismaila Sarr chu an innghahna a ni leh dawn a, Senegalese forward hian tun season Conference League-ah goal kua a khung tawh a, ani aia khung hnem an awm lo.

Sarr thlawp turin Jean-Phillip Mateta leh Yeremi Pino te an awm dawn. Eagles tlarhmate hi World Cup atan an ram team-a tel phâk vek an nih avangin champion beiseina a sang khawp ang.

Vallecano an duai lo

Vallecano tan Jorge De Frutos leh Alexandre Alemao te chu an innghahna an ni ve dawn a, Spanish forward De Frutos hian La Liga-ah goal 10 a khung tling thei a, Alemao pawhin Conference League-ah goal li a khung tawh a, forward pahnihte hi tun hnaiah an khel ṭhat avangin zuam chi an ni dawn lo.

Forward pahnihte hnung ding turin Alvaro Garcia leh Isi Palazon te an nei a, hming langsar tak nei lo mah se a vawi khat nan nomawi chawi an duh dawn avangin an tawh a khirh dawn.

Glasner tan

February 2024-a Glasner an lak hnuah Palace-in hma an sawn a, a luh aṭanga kum khatnaah FA Cup nomawi a lakpui nghal a, final-ah Manchester City lakah a chakpui. Tun season ṭan dawn khan Community Shield-ah Liverpool hnehin Palace a chakpui leh a, nomawi pahnih a lakpui der tawh.

Mahse tun season-ah Eagles hi season hmasaa an player pawimawhten an chhuahsan nasa a, club hotute leh Glasner te thu a inhmuh loh avangin a chhuak dawn tih a sawi chiang tawh. Austrian coach hian European nomawi chawi ngeia Palace a chhuahsan thei a nih chuan a tan inthlahna duhthusam a ni ang.