Bul ṭanna chauh a ni - Emery

Inkhelh banah Aston Villa coach Unai Emery chuan, bul an ṭan dawn chauh thu a sawi a, season tharah chuan Champions League khelh bakah, Arsenal leh Manchester City te an elphâk tur thu a sawi.

Spanish coach chuan, "Europa League kan champion hi a tawpna tur ni loin, a bul ṭanna tur zawk a ni. Season tharah chuan UCL kan khel tawh dawn a, khawvel huapa team ṭha berte an tel avangin kan tan chona lian tak a ni.

Premier League hi league harsa ber a ni a, palina ni tura beih ringawt pawh thil hautak a ni. Mahse season tharah chuan Arsenal leh City te huangah kan awm theih ka ring a, chumi tur chuan kan theihtawp kan chhuak bawk ang," a ti.

Tun season Europa League an ṭan aṭangin Aston Villa hi champion tura rinkai zinga mi an ni nghal a, a chhan chu Europa League 'Specialist' Unai Emery-a'n a enkawl vang a ni. Emery hian a career-ah club hrang hrang pathum chu Europa League final a lo hruai thleng tawh a, Villa hi palina chiah an ni.

Kum 54 mi Emery hian final a thlenpui tawh zingah Arsenal chiah a chakpui zo lo a, kum 2019 khan Chelsea lakah an vanduai. Mahse 2014, 2015 leh 2016 Sevilla chu a zawnin a champion pui a, 2021 khan final-ah Manchester United hnehin Villarreal a champion pui leh bawk. Hemi hnua Europa League nomawi a chawi leh hmasak ber a ni.