France-in squad an puang; champion beiseina a sang

World Cup 2018 champion France chuan USA, Canada leh Mexico te inthlen ṭawm tur World Cup 2026 atan squad an puang a, Ballon d'Or kawltu Ousmane Dembele leh Kylian Mbappe an awm avangin champion tura beiseiawm ber pawl an ni.

Tun lai khawvela forward hmuhnawm ber pawl Dembele hian khawvela footballer ṭha ber chawimawina, Ballon d'Or meuh kawl mah se, World Cup 2018 leh 2022-ah a inlan chungin, goal a la khung miah lo - a record duhawm lo thaichhiat a duh dawn.

Kylian Mbappe a la hmuhnawm reng a, mahse, Real Madrid striker hian Spain a pan hnuah nomawi aiin neuh neuh a ngah zawk - club lama buainate theihnghilhin, a vawi hnih nana nomawi chawi ngei a tum dawn tih a chiang.

France tlarhma hmuhnawm tifamkim turin, Paris St-Germain lama Dembele kawppui Desire Doue leh Bayern Munich player thiam bik Michael Olise te an awm bawk a, Manchester City playmaker Rayan Cherki a la awm cheu bawk.

Arsenal defender William Saliba pawh France squad-ah beisei ang ngeiin a tel a, Liverpool defender Ibrahima Konate pawh a awm.

Fenerbahce midfielder N'Golo Kante pawhin coach Didier Deschamps duhsakna changin squad-ah a tel dawn a, kum 35 a nih ve tawh avangin bul ṭan chat chat tura beisei chi erawh a ni tawh lo.

World Cup 2018-a champion team aṭangin PSG fullback Lucas Hernandez, Mbappe, Kante leh Dembele te an la tel. Hetihlai hian Real Madrid midfielder Eduardo Camavinga tan hmun a awm lo a, Tottenham Hotspur forward Randal Kolo Muani pawh a tel lo.

Player pahnih hi World Cup 2022-ah khan ram tan an inlan ve ve. Liverpool forward Huge Ekitike-a'n Anfield-ah season duhawm tak hmang mah se, hliam vangin a tel thei lo a, PSG goalkeeper Lucas Chevalier pawh koh zingah a tel lo bawk.

France coach Deschamps chuan, "Squad a ni a, player 26 ṭha ber kan thlang chhuak kher lo a, team anga kan khelh ho dan tur leh in balance dan tur ngaihtuah chungin squad hi kan ko a ni," a ti.

Deschamps chuan sawi zawmin, "Camavinga pawh ka koh loh vangin hrehawm a ti hle ang tih ka ring. Mahse, season harsa tak a hmachhawn a, hliamin a tlakbuak reng bawk," a ti a, a koh loh chhan a sawifiah.

France hi World Cup-ah hian group I-ah awmin, Senegal, Iraq leh Norway te nen an awm ho a, World Cup-a group harsa ber pawl a ni ang.