IFL match tawp berah Aizawl FC chak lo

Aizawl FC chuan Thawhṭanni zan khan tun season atana Indian Football League match hnuhnung ber an khel a, Real Kashmir lakah 2-1 in an chak lo. Mizo club hian chak loin season khar mah se IFL khel zel turin an him thung.

Deccan Arena, Hyderabad-a inkhelah Aizawl FC-in an nawr nghal a, goal khung hmasa zawk erawh Real Kashmir an ni thung. First half injury time-ah Christian Moses-a'n penalty aṭangin Real Kashmir hmahruaina goal a khung.

Second half-ah Eric Remruatpuia Chhangte-in ball tauh a tumna lamah a tlu a, thiam taka Real Kashmir player a tluk avangin referee-in penalty a pe ringawt. Minute 60-naah Junior Traore rawn pen chhuakin penalty hi goal-ah a chantir.

Coach R. Lalruatfela hote an beidawng duh lo a, injury time-ah Laltlanzova hmangin siphurh an sut ṭhen. Mizo club-in an nawr chhunzawm a, penalty an hlawh chhuak. MPL12 top scorer Zomuansanga'n penalty a rawn pet a, Real Kashmir keeper Jetli-a'n a dansak. Mizo club an vanduai a, Real Kashmir 2-1 in an chak.

Real Kashmir-in hnehna an chan avangin relegation stage bikah a chung berah an awm a, Aizawl FC-in point 13 hmuin pahnihnaah an awm. Nizan khan Namdhari (10 pts) leh Golukam Kerala (9 pts) an inkhel a, IFL aṭanga relegate tur pawh a chiang ang.