Ramhlun South leh Kulikawn an tho chhuak thei ang em?

Vawiin hian RG Stadium-ah MBOCWWB 8th Inter Village/Local Council Football Tournament semifinal second leg khelh a ni dawn. Tlai dar 4:00-ah Republic Veng leh Kulikawn an inkhel ang a, CYMA Football champion lai Republic Veng hian first leg-ah 2-0 in hnehna an chang.

Zanin dar 7:30-ah Ramhlun South leh Sihphir Venghlun te an inkhel chhunzawm ang a, LPS Cup champion Sihphir Venghlun hian first leg-ah 4-1 in hnehna an chang tawh. Ramhlun South leh Kulikawn tan final kalkawng a harsa dawn a, mah se football-ah thilmak a thleng fo. RG Stadium-a inkhel en man hi Rs 50 chauh a ni a, BR Studio YouTube channel aṭangin a en theih bawk.

Kulikawn beiseina

Inelna ṭan hmain Kulikawnin semifinal an beisei ngam lo ang a, mah se coaching staff leh player-te inpekna zarah a thiam pali zingah an inhlangkai a, an thlen chinah ringawt pawh hian an lawm tawh ang. Chutihrualin minute 90 khelh tur a la awm a, coach BJ Lalbiakhlua hote hian final thlen law law an tum dawn.

Kulikawn hian thawhchhuah an tum a nih chuan defensive game khelh a rem dawn lo a, attacking game khelh a ṭul tawh dawn. Republic Veng coach Lalsangzuala Hmarin Kulikawn a hlau dawn lo tih a chiang a, goal hnih a neih tawh avangin defensive game a khelh a rinawm loh.

Republic Vengin tlarhmaa MPL-ah pawh player langsar ni pha F. Lalrinpuia leh Vanlalthanga te an neih bakah a chawm turin Lalnunzira leh Hmangaihkima te an kawl a, tun inelna hmang ṭha Vanlalkrosschhuangzela Ralte, H. Lalfakzuala leh Joseph C. Lalmuankima te an kawl avangin goal an surtir thei bawk. Kulikawn tan final kawng aiin mualphona kawng a inhawng zau zawk.

Ramhlun South nge nge

ADFA hnuaia inelnaah Ramhlun South vawi thum an champion tawh a, CYMA Football thlenga champion tawh inkhelh thiam veng hi Sihphir Venghlun lakah semifinal first leg-ah 4-1 in an mualpho.

Coach Lalnunmawia (Mawitea) enkawl Ramhlun South hian tawnhriat nei ṭha player Malsawmfela, Lalmawizuala leh Lalremruata te an kawl a, tlawm mai an la tum lo. Video session nena inpuahchahin Sihphir Venghlun lehthlal an tum dawn a, hun chanve lama Ramhlun South-in goal an khung a nih chuan inkhel hmuhnawm tak a hmuh theih ang.

Chutihrualin first leg aṭanga thlir chuan Sihphir Venghlun tan harsa tur a awm tawh lo a, goal tam zawk an khung belh thei bawk. Tun inelnaah Malsawmtluanga Pautu, PC Lalruatsanga, PC Lalruatfela leh Lalmuansanga te an che ṭha a, inrintawk takin Ramhlun South an hmachhawn dawn. Sihphir Venghlun hi inkhelh thiam veng Ramhlun South hnehtu ni ringawt loin sawptu an ni thei tlat.