Manipur hnehtu Rindika 'Mizoram'

Swami Vivekananda U20 Men’s National Football Championship 2026-ah coach Lalrindika Hmar kaihhruai Mizoramin nimin zing khan Manipur an hneh a, final an lut. Nomawi inchuhna hi May 27, Nilainiah khelh a ni chauh dawn a, Mizoram tan hahdamna hun ṭha a awm thei ang.

MFA leh kum dik

Mizoram Football Association-in tun hnaiah thutlukna huaisen tak a siam a, kum bithliah inelnaah kum dik thei ang berin team a tir a ṭhin. Tun ṭum inelnaah pawh hian AIFF lamin CRS-a an kum pawm mah se MFA erawhin 'digital birth certificate' a phut.

Hemi a nih avang hian tun ṭuma Mizoram pawh hi an ṭhat theih dan ber a ni lo a, an thiamna aiin document an en hmasa. Kum dik aṭang chauhin team thlan a ni a, hei hi state dangah kalpui a nih loh avangin tun ṭum inelnaa final an lut hi a hlu hle.

Manipur hnehtu

Mizoramin semifinal thleng turin match li an khelhah match tinah goal ruk an khung tling vek a, Manipur lakah erawh goal khung an harsat. Rindika hote hian ṭum dang an pha lo a, goal hmaah an hriam tawk lo. Chutihrualin tlarhnung erawh a phui ṭha a, goal an chhuah lo.

Minute 120 chhunga goal a luh loh avangin penalty shootout hmangin chak zawk zawn a ni a, Mizoram goalkeeper Lalhruaitluanga Kawlni (Bawihpuia) a chet ṭhat zarah hnehna an chang. Khawzawl rawlthar Bawihpuia'n Salam Meitei leh Md Shuaib te pet a dansak a, captain Chanam Meitei-a'n goal zawnah a pet lo a, Soram Sumit chauhin Manipur tan a pet goal.

Mizoram tana pettu Mesak C. Lalrinngheta, Aldrin Lalpeksanga leh Freddy Lalruatkima ten an khung vek a, 3-1 in an chak. Coach Rindika chuan, "Kan ṭawngṭai nasa ve em em a, ṭawngṭaipuina pawh kan dawng nasa a, Pathian min puihna vang chauha final lut kan ni. Player-te inpekna leh Zoram mipuite min tawngtaipui na vang a ni e," tiin Vanglaini a hrilh.

Final-a Mizoram khingpui tur hi a la hriat loh a, Pathianni aṭang khan group stage an khelh ṭan chauh avangin nomawi zawnna hi May 27, Nilainiah khelh a ni chauh dawn.