Sainunmawia'n silver medal la

Yonex-Sunrise All India Junior Ranking Badminton Tournament 2026-ah Sainunmawia Sailo chuan silver medal a hlawh chhuak a, Mizo hming a timawi leh ta - Ramhlun Venglai rawlthar Mawia hian mixed doubles category-ah medal hi a hlawh chhuak a ni.

May 3-10 inkara Bangalore khawpuia neih inelnaah hian Mawia hi a partner Rishita Pandey nen unseeded ni chungin an inlan a, final an lut thei - round of 32 aṭanga zinkawng zawh ṭanin, Lakshya Mudgal leh Arshita te inkawp chu 21-17, 21-14 in an hneh.

Round of 16-ah hian Mizo tleirawl Lalrinhlui Hmar leh Mangsuan Vemei Kyoveio te inkawp chu 22-20, 21-15 in an hneh leh a, quarterfinal an lut. Semifinal luhna inchuh inkhelah seeded no 7 Arnav Sharma leh Bhavishya Changmai te ṭang dun chu harsatna lian tham tawk loin, 21-17, 21-12 in an hneh zui.

Semifinal hmuhnawm tak chhawp zui a ni a, Mawia te ṭhiandun hian Mohammad Ali Mir leh Shambavi Rauthan te inkawp chu 21-19, 14-21, 21-14 in an hneh. Final-ah pawh mit a tlai leh tak zet a, Punith S. leh Deepak Raj Aditi-te inkawp chu hmachhawnin, uiawm takin, 17-21, 21-16, 21-17 in a tlawm zawkah an ṭang ta a ni.

Mawia te ṭhiandun hian silver medal an lak avang hian kumin kum tawpa Japan-a khelh tur, Badminton Asia Junior Championship atan selection trial an hmachhawn thei dawn a ni.

Sainunmawia hian national level junior tournament-ah medal pahnih a lakna chiah a ni a, sub-junior-ah medal a lo vaw chhuak nual tawh bawk. Tunah hian mixed doubles category bikah All India Ranking 12-na a ni phak a, boy's doubles-ah ranking 18-na a ni bawk - silver medal a hlawh chhuah leh tak avangin a ranking hi a san belh ang.

Mizoram Badminton As-sociation (MBA) chuan thuchhuah siamin, "Mizoram tihmingṭhatu Mawia hi kan chhuangin, kan lawmpui takzet a ni," an ti a, hlawhtlinna a chan zel theih nan duhsakna an hlan bawk.