Krismas laia hmahruaitu Liverpool

Liverpool-in FIFA Club World Cup khelh vangin kartawp Premier League inkhelah a inlan dawn lo a, amaherawhchu an point dinhmun a ṭhat em avangin Jurgen Klopp-a hote hi Krismas laia hmahruaitu an ni chiang tawh. Reds hian hetiang dinhmun hi an vawi li chelhna chiah a ni a, record duhawm tak ni mah se ṭum thum pakhatna dinhmun an chelh tawhnaah season tawpah pakhatna an la ni ngai lo.

Pakhatna tih hian team dinhmun a sawifiah tawk ṭhin lo. Liverpool-in 1996/97 season Krismas laia pakhatna dinhmun an luah khan match khat zela point hnih hmu chauh ang an ni a, season tawpah palina an ni.

2008/09 leh 2013/14 season-ah erawh Reds hi an che ṭha hret a, match khatah 2.17 leh 2.12 point hmu ang an ni. An hmahruai hmasak ṭum ang lo takin Krismas hnu lamah point pawh an hmu sang zawk nachungin Manchester United leh Manchester City hnuaiah an awm.

Nikum Krismas khan Liverpool-in pahnihna dinhmun an hauh leh a, hetah erawh an che ṭha takzet. Jurgen Klopp-a hote hian Krismas hma zawngin match khatah 2.65 an hmu a, season chawhnu lamah tlahniam hret mah se an point hmuh zat hi match khatah 2.48 a la ni pha tho. Amaherawhchu Pep Guardiola enkawl Man City an chetsual ve si loh avangin Reds-in pahnihna ni chungin an khar.

Liverpool hian tun season-ah hneh loh an la tawng lo a, vawi 17 an khelh tawhah vawi khat chiah la inhnehtawkin a bak zawngah an chak vek. Klopp-a hote hi match khata point 2.89 hmu zel ang an ni a, Man City record an nih rual.

2017/18 season khan Man City chuan Premier League an thunun a, Krismas hnu lamah match khat zelah point 2.34 an hmu chungin pakhatna dinhmun an hauh chiang hle. Pep Guardiola kaihhruai Man City hian point 100 an hmu a, anmahni hnaih bertu Man United aiin point 19-in an hmu tam zawk.

Reds hian tun dinhmunah point 49 an hmu a, khelh zat inangah champion lai Man City aiin point 14 tehmeuhin an hmu sang zawk. Krismas laia Klopp-a hote dinhmun thlir chuan Liverpool-in a vawi khat nan Premier League nomawi an chawi dawn a ang ta hle.