Pro Volleyball League-ah 'Vakul' ball

Mizoram Rural Bank Pro Volleyball League-ah Nivia-in a hranpaa ball an siam 'Vakul' hman a ni dawn a, nimin khan LPS Vision director Lalsawmliana Pachuau chuan a tlangzarh.

Infiamna bungrua leh hmanraw hrang hrang siamtu company Nivia-in kum dangah pawh Pro Volleyball-a hman tur ball a tumsak ṭhin a. Nivia hian Mizoten Pro Volleyball an ngaihlu tih an hria a, Mizoram chhunga volleyball inelna sang bera hman tur liau liau ball an siam a, a hmingah 'Vakul' vuahin Pro Volleyball logo nen ball-ah hian an chhu kai bawk.

Pro Volleyball organising committee chairman Sawma chuan, "Pro Volleyball pual bika ball an rawn siam hi, thil thar leh hmasawnna chhinchhiahtlak tak a ni. LPS leh Mizoram Volleyball Association (MVA)-in India rama company lian ngaihven tham inelna an buatsaih thei chu thil lawmawm tak a ni," tiin a sawi.

Mizoram Volleyball Association vice president Pu C Lalrokhuma chuan, "Mizo nun hluiah, thangchhuah leh khuangchawi theite chauhin Vakul chang an tawn thei a, Pro Volleyball pawh Pro Division-a awm club-te chauhin an khelh theih inelna sang a ni a, chuvangin ball hming atan Mizote tana sava pawimawh tak 'Vakul' tih phuah a ni," tiin ball hming vuah chhan a sawifiah.

Pro Volleyball vawi kuana hi May 11, Thawhṭanni zan hian LPS Arena, Falkland-ah khelh a ni dawn. Mipa inelnaah team team sarih an tel a, a hawn zanah champion lai Anastasia Electric Veng leh Thutak Nunpuitu Team an inkhel ang.

Hmeichhe lamah team pali an inel ve thung dawn a, June 1, Thawhtanniah an ṭan ve thung dawn. Zan khatnaah hian team pali Eric Pautu Academy, ITI Veng GSA, Tuichangral leh Chhinga Veng Spikers te an inlan nghal vek ang.